Бэс ыйын 3-26 күннэригэр Эдьигээн орто оскуолатын иһинэн «Серун» оҕо сайыҥҥы сынньалаҥ лааҕырыгар 5 этэрээт уопсайа 89 оҕону хабан үлэлээтэ. Олор истэригэр “Алмаз” этэрээккэ 14 уол сырытта, салайааччынан Эдьигээн орто оскуолатын физкультураҕа учуутала Айаал Арианович Александров бэрт таһаарыылаахтык үлэлээтэ. Уол оҕону эт-хаан өттүнэн сайыннарыы, патриотическай санааны иҥэрии этэрээт үлэтин сүрүн сыалынан-соругунан буолла.
-Күннэтэ спордунан дьарыктаныы таһынан оҕолор этэрээт уонна лааҕыр иһинэн ыытыллар тэрээһиннэргэ көхтөөх кыттыыны ыллыллар. Ол курдук, лааҕырбыт сезона «Билсиһии күнэ», «День идей», «Аан дойдутааҕы сүүрүү күнэ», «Спорт» тэрээһиннэринэн саҕаламмыта. Аан дойдутааҕы доҕоттор күннэригэр уолаттар «Лето навсегда» плакат күрэҕэр кыттыбыттара уонна оройуоннааҕы историческай музейга сылдьыбыппыт. Арассыыйа, Муусука, Айылҕа, Аҕа дойду Улуу сэриитэ саҕаламмыт кутурҕан күннэригэр, Үрүҥ Тунах Ыһыахха, «Серун» оҕо сайыҥҥы сынньалаҥ лааҕырын арыллыытыгар уонна сабыллыытыгар ыытыллыбыт тэрээһиннэргэ көхтөөх кыттыыны ылбыппыт. Арассыыйа байыаннай сулууспатын историятын, Аан дойду Улуу сэриитин уонна билигин буола турар анал байыаннай дьайыы кыттыылаахтарын, геройдарын хорсун быһыыларын сырдатар тэрээһин буолан ааспыта. Ону сэргэ этэрээт оҕолорун икки ардыларыгар буулдьа саанан ытыыга, спорт национальнай көрүҥнэригэр, араас спортивнай күрэхтэр буолбуттара. Оҕолор эт-хаан өттүнэн сайдан, айылҕалыын алтыһан, оонньоон-көрүлээн, күүс-уох ылынан сайыҥҥы күннэрин туһалаахтык атаардылар, — диэн кэпсээтэ Айаал Александров.