Балаҕан ыйа үүнэн оскуолаларга саҥа үөрэх сыла саҕаланан үөрэх тэрилтэлэрэ оҕо саҥатынан чугдаараллар. Онтон быйыл күһүн 50 сыл анараа өттүгэр Эдьигээн орто оскуолатын боруогун аан бастаан атыллаабыт оччотооҕу үөрэнээччилэр үөрэммит кыһаларыгар кэлэн ыалдьыттаатылар. 1974 сыллаахха Эдьигээн орто оскуолатыгар 42 оҕо маҥнайгы кылааска үөрэнэ киирбит эбит. Саха кылааһын СӨ оскуолаларын үтүөлээх учуутала, Эдьигээн оройуонун бочуоттаах олохтооҕо Татьяна Герасимовна Васильева бэйэтин кынатын анныгар ылбыта.
-Көрүөх бэтэрээ өттүгэр номнуо 50 сыл ааһа охсубут эбит, эмиэ да киһи сонньуйар, долгуйар. Ол эрэн оҕо сааспыт биир кэрэ кэрдиис кэмин эргиттэхпитинэ санаабыт көнньүөрэр, эдэрдии эрчими, дуоһуйууну иҥэрэр. 50 сыл анараа өттүгэр саха кылааһыгар үөрэнэ киирбиппит. Убаастыыр учууталбыт биһиги дьоһун дьон, киһи киэнэ кэрэтэ буола үүнэрбитигэр, олохпутугар сөптөөх суолу таларга олук уурбута. Онон киниэхэ махталбыт муҥура суох. Бу бэлиэ датаны быһа гыммакка үөрэммит оскуолабытыгар маҥнайгы кылааска үөрэнэ киирбит кырачааннары кытта көрүстүбүт уонна бииргэ үөрэммиттэр ааттарыттан өйдөбүнньүк бэлэхтэри туттардыбыт. Сахалыы тыллаах маҥнайгы кылааһы Планета Андреевна Павлова салайар эбит. Быйыл арыллыбыт үс кылаастан биирэ эрэ сахалыы, иккитэ нууччалыы кылаастар эбиттэр. Хомойуох иһин, быйыл сахалыы кылааска үс эрэ оҕо үөрэнэ киирбит. Түгэнинэн туһанан, аныгы төрөппүттэргэ сүбэлиэ, санатыа этибит. Төрөөбүт төрүт тылын билбэт киһи тирэҕэ, көмүскэлэ суох курдук буолар, олох араас моһоллорун туорууругар мунар. Уйулҕа үөрэхтээхтэрэ да этэллэринэн, киһи толору, дьоллоох олоҕу олороругар төрүттэрин билэр буолуохтаах. Тылы билбэт киһи төрүттэрин кытары ситимэ быстар. Оҕо төрөөбүт төрүт тылын билбэтэ — көмүскэлэ суох сылдьыбытын кэриэтэ буоларын төрөппүттэр өйдүөх тустааххыт. Түгэнинэн туһанан, учууталбытыгар Татьяна Герасимовнаҕа сахалыы тыыннаан биһигини кэрэҕэ-үтүөҕэ угуйбутугар, билии киэҥ аартыгын арыйбытыгар махталбытын тиэрдэбит. Баҕарабыт кытаанах доруобуйаны, эстибэт эрчими, өссө да уһун дьоллоох олоҕу. Бу курдук биһиэхэ үтүө сүбэһит, наставник буола сырыт. Көрсүһүү түмүгэр маҥнайгы кылаас үөрэнээччилэрэ Яна, Саяна, Сайаана биһиэхэ бэйэлэрэ оҥорбут аккырыыккаларын бэлэх ууннулар. Кырачааннарга үөрэхтэригэр ситиһиилэри, саҥа-сонун арыйыылары, сайдыыны баҕарабыт, — диэн кэпсээтилэр Инна Варламова, Иван Сергеев, Виктория Иванова, Альбина Дмитриева уонна Яна Андреева.