Муус устар 13 күнүгэр Баахынай нэһилиэгэр олохтоох оскуолаҕа физкультура учууталынан уонна тустууга тренеринэн үлэлээбит Айсен Владимирович Николаев сырдык кэриэһигэр оҕолорго көҥүл тустууга уонна улахан дьоҥҥо хапсаҕайга оройуон таһымнаах аһаҕас турнир буолан ааста. Тэрээһин Эдьигээн улууһугар сахалартан бастакы Олимпийскай чемпион Р.М.Дмитриев төрөөбүтэ 75 сылыгар ананна. Турнирга 33 тустуук оҕолор 8 ыйааһыҥҥа кииристилэр, онтон хапсаҕайга 17 улахан киһи кыттыыны ыллылар.
Турнир үөрүүлээх арыллыыта кыттааччылар сэлэлии хаамыыларыттан саҕаланна. Манна Бүлүү улууһун Хаҕын нэһилиэгиттэн, Эдьигээн оройуонун Бэстээх, Кыстатыам, Баахынай, Эдьигээн нэһилиэктэрин инники кэскиллэрэ, спортсменнара, Бүлүүтээҕи профессиональнай-педагогическай колледж студеннара уонна Эдьигээннээҕи оҕо спортивнай оскуолатын иитиллээччилэрэ кыттыыны ыллылар.
Турнир кылаабынай судьуйатынан Айсен Николаев тастыҥ быраата Прокопий Николаев үлэлээтэ. Бу күн бөҕөстөрү, Айсен Николаев төрөппүттэрин, дьиэ кэргэнин, бары аймахтарын суолталаах, бэлиэ тэрээһининэн эҕэрдэ тылларын тиэртилэр Эдьигээн оройуонун баһылыга В.Н.Сорокин, Лииндэ нэһилиэгин баһылыга Н.И.Антонов, турнир кылаабынай судьуйата П.О.Николаев. Салгыы Антон Гаврильев-Сайдам Кудай бэйэтин авторскай ырыатын бэлэх уунна.Турнир саҕаланан, бөҕөстөр бииртэн биир тыҥааһыннаах киирсиилэри көрдөрдүлэр. Киирсиилэр түмүктэринэн кыайыылаахтар, призердар өйдөбүнньүк мэтээллэринэн, грамоталарынан уонна сыаналаах бириистэринэн наҕараадаланнылар. 2013-2016сс. төрүөхтэргэ 25 киилэҕэ диэри ыйааһыҥҥа: 1 миэстэ — Алеша Филиппов (Эдьигээн), 2 миэстэ — Артем Дмитриев (Эдьигээн), 3 миэстэ — Самуил Семенов(Хаҕын). 30 киилэҕэ дылы ыйааһыҥҥа: 1 миэстэ — Баир Семенов (Хаҕын), 2 миэстэ — Вениамин Гаврильев (Бэстээх), 3 миэстэ — Герман Софронов (Эдьигээн). 35 киилэҕэ дылы ыйааһыҥҥа: 1 миэстэ — Тимур Евсеев (Эдьигээн), 2 миэстэ — Артем Иванов (Эдьигээн), 3 миэстэ — Максим Ощепков (Эдьигээн. 40 киилэҕэ диэри ыйааһыҥҥа: 1 миэстэ — Виталий Петров (Эдьигээн), 2 миэстэ — Айгылаан Васильев (Хаҕын), 3 миэстэ Павел Николаев (Хаҕын). Финалга 50 киилэҕэ дылы ыйааһыҥҥа: 1 миэстэ — Артур Афанасьев (Эдьигээн), 2 миэстэ — Вадим Петров (Баахынай). 2012-2013сс төрүөхтэргэ 40 кг утарылаһааччыта суоҕунан сибээстээн кыайыылааҕынан Юрий Слепцов (Эдьигээн) буолла. 50 киилэҕэ дылы ыйааһыҥҥа: 1 миэстэ — Сайаан Ксенофонтов (Баахынай), 2 миэстэ — Павел Николаев (Баахынай), 3 миэстэ — Алгыс Пахомов (Ха5ын). 50 кг үөһэ ыйааһыҥҥа: 1 миэстэ — Максим Федотов (Эдьигээн), 2 миэстэ — Владимир Антонов (Баахынай), 3 миэстэ — АрылханПавлов (Хаҕын). Кыайыылаахтары уонна бириистээх миэстэҕэ тиксибиттэргэ спонсордар туруорбут бириистэрэ туттарылыннылар. Ол курдук, «За лучшую технику» — Баир Семенов (Хаҕын), «Перспективный борец» — Алексей Филиппов (Эдьигээн), «За волю к победе» — Вениамин Гаврильев Лииндэ нэһилиэгин ыччатын аатыттан 6-лыы тыһ.солк. суумалаах сертификаттары туттулар. «Приз зрительских симпатий» анал ааты Владимир Антонов (Баахынай) ылла уонна 5 тыһ.солк. суумалаах сертификаты Айсен Владимирович Лииндэ ситэтэ суох орто оскуолатыгар бииргэ үөрэммит доҕорун Юрий Николаевич Софронов аатыттан бэлэх тутта. «АрктикТелеком» тэрилтэттэн планшет бирииһи Максим Федотов (Эдьигээн) ылла. «Самый юный борец» аат хаһаайыныгар Давид Ильиновка (Эдьигээн) Айсен Владимирович тастыҥ бырааттара Егор уонна Василий Слепцовтар 5 тыһ.солк. суумалаах сертификаты биэрдилэр. «Лучший борец турнира» анал аат Ксенофонтов Сайааҥҥа иҥэрилиннэ, бирииһэ 10 тыһ. солк., «Красивый бросок» — Артем Иванов (Эдьигээн), бирииһэ 8 тыһ.солк,
«Лучшая схватка» — Павел Николаев (Баахынай), бирииһэ 8 тыһ.солк, бу сертификаттары Айсен Николаев аймахтара анаатылар. Айсен Владимирович тастыҥ эдьиийдэриттэн, балтыларыттан, бырааттарыттан Көстөкүүнчээн сыдьааннарын ааттарыттан анал сыаналаах бириистэри Адам Сафиулин (Эдьигээн), Айсен Слепцов (Баахынай), Виталий Петров (Эдьигээн) туттулар. «Тренер чемпиона» анал аат Филипп Марковичка (Хаҕын) тигистэ уонна Эдьигээн оройуонун ыччат политиката уонна спорт отдела туруорбут сыаналаах анал бирииһин бэлэх тутта. Кэскиллээх тустуукка Сайаан Ксенофонтовка (Баахынай) Гурьев Виталий Николаевич 8 тыһ.солк. уу харчынан бэлэх уунна. Айсен Николаев тустуунан дьарыктанар улахан уолугар Павел Николаевка (Баахынай) аҕатын кытта Мэҥэ-Хаҥалас улууһун Табаҕа орто оскуолатыгар бииргэ үөрэммит доҕотторо, алтыспыт табаарыстара смарт-чаһы уонна 30 тыһ.солк. суумалаах сертификат бэлэхтэрин анаатылар. Түмүккэ бары 8 ыйааһыҥҥа чемпионнаабыт бөҕөстөр сэрэбиэй түмүгүнэн Айсен Владимирович Мэҥэ-Хаҥаласка бииргэ үөрэммит доҕотторо туруорбут супер-бириистэрин- сотовай телефону Юрий Слепцов (Эдьигээн) сүүйдэ.
Онтон улахан дьоҥҥо 70 киилэттэн үөһэ ыйааһыҥҥа 1 миэстэни Александр Алексеев (Бүлүү), бирииһэ 15 тыһ.солк. ,2 миэстэни Альберт Устинов (Кыстатыам), бирииһэ 10 тыһ.солк., 3 миэстэни Тит Федоров (Бүлүү) бирииһэ 5 тыһ.солк. ыллылар. 70 киилэҕэ дылы ыйааһыҥҥа кыайыылааҕынан Докторов Евгений (Бүлүү), бирииһэ 15 тыһ.солк., 2 миэстэ — Александр Рассадин (Эдьигээн), бирииһэ 10 тыһ.солк., 3 миэстэ — Алемпий Дохунаев (Бүлүү), бирииһэ 5 тыһ.солк., буоллулар. Салгыы хапсаҕайга абсолютнай киирсиигэ 12 улахан дьон кыттыбытыттан кыайыылааҕынан Петр Алексеев (Бүлүү) тахсан, Лииндэ нэһилиэгин дьаһалтатыттан 20 тыһ.солк. суумалаах сертификаты сүүйэн ылла.
-Бу турниры кэнчээри ыччаппыт чөл олоҕу өрө тутар, көҥүл тустууну сайыннарар, көҕүлүүр сыаллаах-соруктаах, эдэр сааһыгар соһумардык олохтон туораабыт улахан уолбут, эрэлбит Айсен Владимирович Николаев аатын үйэтитэр санааттан ыыттыбыт. Биһиги уолбут үөрэммит Лииндэ ситэтэ суох орто оскуолатыгар физкультура учууталынан уонна тустууга тренерынан үлэлээбитэ. Үөрэтэр оҕолоро үгүс ситиһиилэнэллэрэ, элбэх былааннаах, ыра санаалаах этэ. Бу турниры иилээн-саҕалаан, салайан ыыппыт, тэрийэрбитигэр күүс-көмө буолбут Эдьигээн оройуонун уонна Лииндэ нэһилиэгин дьаһалталарыгар, улуустааҕы ыччат политикатын уонна спорт отделыгар уонна оройуоннааҕы үөрэх управлениятыгар барҕа махталбытын тиэрдэбит. Оройуоммут бары нэһилиэктэриттэн уонна ыаллыы сытар Бүлүү улууһуттан кэлэн кыттыбыт спортсменнар турнир таһымын үрдэтэн, бэртээхэй хапсыһыылары көрдөрдүлэр. Бөҕөстөрбүт дьулуурдаах, тулуурдаах, тыҥааһыннаах хапсыһыылара көрөөччүлэри сөхтөрдө, биһирэбиллэрин ылла. Түгэнинэн туһанан, турнир үрдүк таһымнаахтык ааһарыгар бары күүстэрин уурбут, анал бириистэри туруорбут, сүүрбүт-көппүт биир дойдулаахтарбытыгар, Лииндэ нэһилиэгин ыччатыгар уонна оҕобут истиҥ доҕотторугар, үөрэппит учууталларыгар, бииргэ үлэлээбит коллегаларыгар, Мэҥэ-Хаҥалас улууһун Табаҕа орто оскуолатыгар бииргэ үөрэммит оҕолоругар, Баахынайга бииргэ үөрэммит доҕоругар Юрий Николаевич Софроновка, Табаҕатааҕы эрэллээх доҕотторугар, турниры иилээн-саҕалаан ыыппыт улууспут баһылыгар Василий Николаевич Сорокиҥҥа, Лииндэ нэһилиэгин баһылыгар Николай Иванович Антоновка уонна специалиһыгар Яков Вениаминович Софроновка, улуустааҕы ыччат политикатын уонна спорт отделыгар, тэрээһини бэлэмнэспит «Сайдам» сынньалаҥ киин коллективыгар, Көстөкүүнчээн сыдьааннарыгар, Ньукулаайаптарга барыларыгар муҥура суох махталбытын тиэрдэбит. Маны сэргэ турнир кыттыылаахтарын түһэр сирдэрин хааччыйбыт Лииндэ ситэтэ суох орто оскуолатын техническэй улэһиттэригэр, турнирга оҕолору бэлэмнээбит энтузиаст, тустууну сүгүрүйээччи уолаттарга Петров Сашаҕа, Кириллин Ньургустаҥҥа, Мандаров Владимирга махтанабыт. Тренердэри, салайааччылары, кыттааччылары итии аһынан хааччыйбыт саҥастарбытытыгар Матрена Семеновнаҕа, Августина Прокопьевнаҕа, сүбэ-ама буолбут дьоммутугар-сэргэбитигэр барыгытыгар махтал мааныта буолуохтун. Кэнчээри оҕолорбут чөл олохтоох, туруктаах буолалларын, көҥүл тустуу сайдарын туһугар хас биирдиигит бэйэҕит кылааккытын киллэрбиккитин бэлиэтиибит, сүгүрүйэбит. Үлэҕит-хамнаскыт ситиһиилээх, таһаарыылаах буоллун, тус олоххутугар дьолу-соргуну баҕарабыт. Дойдубут инники сайдыытыгар кылааккыт иһин дьон махтала кэлэ турдун диэн алгыс тылбытын аныыбыт! – диэн санааларын үллэһиннилэр төрөппүттэрэ Ольга Петровна уонна Владимир Николаевич Николаевтар.
-Тапталлаах кэргэним, үс оҕом амарах аҕалара Айсен Владимирович Николаев сырдык кэриэһигэр ыытыллыбыт турниры тэрийэргэ күүс-көмө, өйөбүл, үтүө сүбэһит буолбут улууспут баһылыгар Василий Николаевич Сорокиҥҥа, Лииндэ нэһилиэгин баһылыгар Николай Иванович Антоновка, улуустааҕы ыччат политикатын уонна спорт отделын кылаабынай специалиһыгар Прокопий Олегович Николаевка, «Сайдам» сынньалаҥ киин үлэһиттэригэр уонна салайааччытыгар Марианна Валерьевна Ильиноваҕа, турнир спонсордарыгар — урбаанньыт Николаев В.Н., Николаевтар халыҥ аймахха, «АрктикТелеком» тэрилтэҕэ, Мэҥэ-Хаҥалас улууһун Табаҕа нэһилиэгин ыччаттарыгар, Айсен Николаев бииргэ үөрэммит доҕотторугар, үөрэппит учууталларыгар, бииргэ үлэлээбит Лииндэ оскуолатын коллективыгар, Лииндэ нэһилиэгин ыччатыгар, Көстөкүүнэптэр сыдьааннарыгар, Слепцов Василий Максимовичка, Софронов Юрий Николаевичка махтал бастыҥын аныыбын. Ону сэргэ, күрэхтэһиигэ ыраахтан-чугастан кэлбит кыттааччыларга, тренердарга махтал бастыҥа буолуохтун, өссө даҕаны элбэх кыайыыны-хотууну ситиһэргитигэр баҕарабын. Бу турнир инникитин үтүө үгэскэ кубулуйан ыытыллыа туора диэн баҕа санаабын тиэрдэбин, — диэн кэпсээтэ Аэлита Николаева.
Айсен Николаев төрөппүттэрэ кини спортка ситиһиилэрин мэктиэлиир хаартысканан, грамоталарын, мэтээллэрин көрдөрөр быыстапканы тэрийбиттэрин дьон-сэргэ сэҥээрэ, сэргии көрдүлэр.