Муус устар 3 күнүгэр Лииндэ нэһилиэгин Баахынай үрэҕэр сынньалаҥ базатын үөрүүлээх арыллыыта буолан ааста. Оскуола директора Аэлита Николаева уонна предприниматель Егор Слепцов олохтоох ыччаты көҕүлээн, түмэн субуотунньуктары тэрийэн бэртээхэй сынньалаҥ базатын оҥорон олоххо киллэрдилэр. Ыччаты Лииндэ нэһилиэгин дьаһалтата, Олох-дьаһах коммунальнай хаһаайыстыбата, «Сайдам» ЭКК өйөөн сынньалаҥ базата бу күннэргэ үлэтин саҕалаата.
-Быйыл нэһилиэк ыччата сааскы ылааҥы өрөбүл күннэри туһанан Баахынай үрэҕэр сынньалаҥ базатын оҥорорго санаммыттара. Онон бу баҕа санаалара олоххо киирбититтэн үөрүүлэрэ үгүс буолла. Сынньалаҥ базатын сүрүн миэстэтин хаҥкылыыр сир ылар. Кэлбит дьон хаҥкыны уларсан, балааккаҕа уларыттан килэҥ мууска хаҥкылыыллар. Ону сэргэ үрэх уҥуор кыра оҕолорго уонна улахан дьоҥҥо диэн тус-туспа сырылыыр сир оҥоһуллубут, манна эмиэ сырылыыр тэриллэри уларсыахха сөп. Арендаттан киирбит үбү-харчыны сайынын оҕолор сынньанар былаһааккаларын тупсарыыга туттар былааннаахтарын, бу бырайыагы көҕүлээччилэр иһитиннэрэллэр. Сынньалаҥ базатыгар шашлыктыыр анал миэстэ эмиэ оҥоһуллубут, киэһэ хараҥарыыта гирлянда уота көстүүнү киэргэтэр, — диэн тэрийээччилэр иһитиннэрэллэр.