Олунньу 25 күнүн иккис аҥарыгар СӨ Ситэриилээх былааһын сыллааҕы отчуота Бэстээх нэһилиэгэр буолан ааста. Бэстээххэ тиийээт Дмитрий Садовников, Дмитрий Татаринов уонна нэһилиэк баһылыга Петр Афанасьев саҥа хочуолунайы баран көрдүлэр. Санатан эттэххэ, сыл саҕаланыыта оскуола-уһуйаан, олорор дьиэлэр уонна гараас оттуллан олорбут хочуолунайдара бүтүннүү баһаарга былдьаммыта. Онон урукку хочуолунай оннугар бэрт кылгас кэм иһигэр 2,5 МВт кыамталаах саҥа хочуолунай тутулунна.
— Эбийиэк тутуута «ЖКХ «Альтернатива» ХЭТ инвестициялыыр бырагырааматынан кылгас кэм иһигэр түмүктэннэ. Оттук сезона тохтобула суох ааһарын туһугар уматык Кировскай чохтоох сириттэн тиэллиэ. Кулун тутар ортотуттан номнуо үлэтин саҕалыахтаах уонна 32 дьиэни кытта икки социальнай эбийиэги сылааһынан хааччыйыахтаах. Бэлиэтээн эттэххэ, саҥа хочуолунайга 1,25 МВт кыамталаах икки хочуолу кытта, 1,74 МВт кыамталаах саппаас оһох үлэлиэхтэрэ, — диэн иһитиннэрдэ Дмитрий Садовников.
Нэһилиэнньэни кытта көрсүһүү оскуола-уһуйааҥҥа буолла. Хочуолунай баһаарга былдьанан үөрэх тэрилтэтэ аҥара тоҥон турар, аҥара уотунан барар ититэр ситимҥэ холбоммут. Онон билигин уһуйаан үлэтэ, үөрэх чааһа дьиэ кыра аҥарыгар ыытыллар. Ол иһин олохтоохтор саҥа хочуолунай үлэҕэ түргэнник киирэрин долгуйа күүтэллэр. «Социальнай эбийиэктэр, олорор дьиэлэр холбонон турбут хочуолунайдара хаарбах туруктаах буолан уокка былдьаммытыгар бэйэбитин буруйдаах сананабыт уонна эппиэтинэһи сүгэрбитин билэбит. Атын тэрилтэ кэлэн саҥа хочуолунайы үлэлэтиэ, нэһилиэги ититэр ситимҥэ холбуурга үлэни барытын бэйэтэ ыытыа диэн көхсүбүтүн көрдөрөр санаабыт суох. Саҥа хочуолунай үлэҕэ киирэригэр бэйэбит өттүбүтүттэн кыаллар үлэлэри ыытар, саахаллары суох оҥорор былааннаахпыт. Билигин саахаллары туоратарга ОДьХх Бүлүүтээҕи филиалын үлэһиттэрэ кэлэн үлэлии сылдьаллар» — диэтэ СӨ «Олох-дьаһах коммунальнай хаһаайыстыбатын” ГУТ кылаабынай инженера Владимир Бондарь. Биллэрин курдук, ыраах хотугу улуустарга тутуу матырыйаалын тиэрдиигэ тырааныспар ороскуота быдан үрдүк буолар. Бэстээх олохтоохторо араас программалары туһанан, бэйэлэрин тус кыахтарынан чааһынай дьиэлэри тутталлар. Эдьигээн оройуонун дьаһалтата 2022 сылтан бэйэлэрин кыахтарынан тутуу матырыйаалын аҕалтарбыт дьоҥҥо, тырааныспартнай ороскуоттарын көҕүрэттэллэригэр 150 тыһ. солк. суумалаах көмөнү оҥорор. Онтон Бэстээх олохтооҕо Варвара Иннокентьева өрөспүүбүлүкэ өттүттэн туох көмө баарын ыйытта.
— Быйылгыттан Арктика 13 оройуонун олохтоохторугар чааһынай дьиэ тутталларыгар тутуу матырыйаалын аҕаларга көмө ыытыллыаҕа. Арктикатааҕы эргиэн-логистика хампаанньата босхо тиэрдэн биэриэҕэ. Бу көмө саҥа миэрэтэ Ил Дархан Айсен Николаев сорудаҕынан оҥоһулунна. Бүгүҥҥү күҥҥэ туох тэрээһин, дьайыы ыытылларын быһаардыбыт, сотору кэминэн Арктикаҕа чааһынай дьиэни туттууну өйүүр миэрэлэри ылыахпыт. Дьиэ туттуон баҕарбыт киһи Дьокуускайга кэлэн тутуу матырыйаалын атыылаһар уонна хампаанньа баазатыгар аҕалан уурдарар. Оттон хампаанньа кыһыҥҥы суолунан, эбэтэр, уунан тиэйэн, хоту улууска тиэрдэн биэрэр. Хаһан уонна ханна сайаапка хомуллара кулун тутарга бигэргэтиллиэ, — диэн иһитиннэрдэ СӨ тутуу миниистирин бастакы солбуйааччы Евгений Афанасьев.
Олохтоохтор нэһилиэккэ үлэлии кэлэр специалистарга дьиэнэн хааччыйыы кыһалҕата сытыытык турарын этиннилэр. 2012 сыллаахха эдэр специалистарга түөрт квартиралаах дьиэ тутуллан үлэҕэ киирбитэ эрээри, иэнэ кырата бэрт буолан оҕолоох дьон, ыал олороругар табыгаһа суоҕун эттилэр. Онон саҥа дьиэ тутулларын туруорустулар. Оскуола-уһуйаан директора Раиса Корякина дьиэ суоҕунан сибээстээн кадрдарынан толору хааччыллыбакка олоробут диэн бэлиэтээтэ.
«Тыа сирин кэлимник сайыннарыы» судаарыстыбаннай бырагырааммаҕа киирсэргэ, дьиэни тутууга СӨ тыатын хаһаайыстыбатын уонна ас-үөл бэлиитикэтин министиэристибэтигэр олохтоох уонна улуус дьаһалтата бииргэ үлэлээн сайаапка ыытыахтарын сөбүн тустаах министерство миниистирэ Артем Александров эттэ. Сайаапка биэрэргэ эбийиэк бырайыагын, сметатын докумуонун оҥорууга бырабыыталыстыба өттүттэн көмөлөһүөхпүт, түөрт квартиралаах дьиэ тутулларыгар быһаарыныы ылынабыт диэн Дмитрий Садовников эрэннэрдэ.
Бэстээхтэр бырабыыталыстыба отчуотун биһирээтилэр.