Балаҕан ыйын 19 күнэ — Аҕа дойду Улуу сэриитин сылларыгар Чурапчы оройуонун холкуостарын хоту улуустарга күүс өттүнэн көһөрүллүүгэ барбыт дьону ахтан-санаан ааһар Кэриэстэбил күнэ. Эдьигээн оройуонун олохтоохторо Чурапчы алдьархайын умнубаттар. Улууска билигин үс Чурапчы көһөрүллүүтүн тыыннаах туоһулара олороллор. Кэриэстэбил күн сылын аайы оройуон дьаһалтатын өттүттэн кинилэргэ болҕомто ууруллар.
Бу күн Анна Степановна Портнягинаҕа, Людмила Петровна Козловаҕа, Мария Васильевна Федороваҕа оройуонун баһылыгын социальнай боппуруостарга солбуйааччы Софья Ефремова уонна Социальнай харалта салалтатын салайааччыта Яна Андреева ыалдьыттаатылар. Аҕам саастаах дьон доруобуйаларын ыйыталастылар, ирэ-хоро кэпсэттилэр, өттүк харалаах тиийдилэр. Онтон оччотооҕу кэм тыыннаах туоһулара Чурапчы алдьархайын санаатылар, төрөппүттэрин, чугас дьоннорун аҕыннылар. Бэйэлэрин кэмнэригэр үлэ үөһүгэр сылдьан, дьон-сэргэ убаастабылын ылан, ыал буолан, оҕо-уруу тэнитэн, алаһа дьиэ тэринэн билигин дьоллоох олоҕу олоробут диэн кырдьаҕастар санааларын үллэһиннилэр.
Федорова Мария Васильевна Чурапчы улууһун Хадаар нэһилиэгиттэн төрүттээх, СӨ Бэчээтин туйгуна, үлэ бэтэрээнэ, «Гражданскай килбиэн» бэлиэлээх. Козлова Людмила Петровна педагогическай үлэ бэтэрээнэ, Эдьигээн оройуонун бочуоттаах олохтооҕо, ийэтэ Агафья Дмитриевна Чурапчы улууһун Бахсы нэһилиэгиттэн көһөрүүгэ кэлбитэ. Үлэ бэтэрээнэ Портнягина Анна Степановна аҕата Портнягин Степан Иванович Чурапчы көһөрүүтүгэр Эдьигээн сиригэр кэлэн Хатыгын нэһилиэгин нассоветын, С.М.Киров аатынан колхуос бэрэссэдээтэллэринэн, Бэстээх бөһүөлэгин тутуутугар, оройуон биир тутаах тэрилтэтигэр — райпоҕа үтүө суобастаахтык үлэлээн ааспыта.