2024 сылы дойдубут Президенэ Владимир Путин Арассыыйаҕа Дьиэ кэргэн сылынан биллэрбитэ. Дьиэ кэргэн сылын бэлиэтин сүрүн сыала-соруга ыал буолуу уонна үгэскэ кубулуйбут дьиэ кэргэн сыаннастарын хараалын эйгэтигэр судаарыстыбаннай бэлиитикэни үрдэтии буолар. Бу күннэргэ Эдьигээн оройуонугар олорор Саина уонна Василий Слепцовтар, Сайаана уонна Мичил Романовтар олохторун бииргэ холбуур баҕаларын сокуонунан бигэргэттилэр.
Лииндэ нэһилиэгин эдэр ыала Саина уонна Василий Слепцовтар Дьиэ кэргэн сылыгар сөп түбэһиннэрэн сокуонунан ыал буоларга санаммыттар. Үөрүүлээх быһыыга-майгыга Лииндэ нэһилиэгин дьаһалтата Слепцовтарга 10 тыһ.солк. суумалаах сертификат туттарда.
-Биһиги 2016 сыллаахха Дьокуускай куоракка билсибиппит уонна бииргэ буоларга санаммыппыт. 2019 сыллаахха улахан уолбут Уйусхаан күн сирин көрбүтэ, оҕобутун күүтэр кэммитигэр аҕабыт Ийэ дойдутугар ытык иэһин төлүү армияҕа сулууспалыы барбыта. 2020 сыллаахха кэргэним дойдутугар Баахынайга көһөн кэлбиппит. 2021 сыллаахха кыра уолбут Арсалан күн сирин көрбүтэ. Мин бэйэм Үөһээ Дьааҥы улууһуттан сылдьабын, уруһуй уонна черчение учууталабын, бу идэбинэн оскуолаҕа үлэлиибин. Аҕабыт бэйэ дьыалатын арынан нэһилиэнньэҕэ сваркалааһын өҥөтүн оҥорор. Нэһилиэккэ, улууска ыытыллар тэрээһиннэргэ көхтөөх кыттыыны ылабыт. Оҕолорбут олоххо көхтөөх, чөл туруктаах, сырдыкка-үтүөҕэ талаһар дьоһун дьон буола улааталларыгар бары күүспүтүн уурабыт. Түгэнинэн туһанан, ыал буолбут кэрэ-бэлиэ күммүтүгэр нэһилиэкпит дьаһалтата болҕомто уурбутугар барҕа махталбытын тиэрдэбит, — диэн кэпсээтэ Саина Слепцова.
-Биһиги 2021 сыллаахха Эдьигээҥҥэ билсибиппит. Сайаана «Кустук» дьиэ кэргэҥҥэ уонна оҕолорго социальнай көмөнү оҥорор тэрилтэҕэ иитээччинэн, мин “Айсквант” оҕону эбии үөрэхтээһин тэрилтэтин салайааччытынан үлэлиибит. Биһиги тапталбытын, истиҥ сыһыаммытын, бииргэ буоларбытын сокуонунан бигэргэтэн ыал буоллубут. Олохпут биир бэлиэ, дьоллоох түгэнэ Арассыыйаҕа биллэриллибит Дьиэ кэргэн сылыгар сөп түбэспититтэн ордук үөрэбит, — диэн Романовтар үөрүүлэрин үллэһиннилэр.