Бүгүн оройуоннааҕы бибилитиэкэ ааҕар саалатыгар норуот кыаҕынан күн сирин көрбүт «Ийэ5э махтал- в благодарность Матери» кинигэ иккис туома сүрэхтэннэ. Ол төрүөтүнэн бу өрөспүүбүлүкэ таһымыгар тахсыбыт кинигэҕэ Эдьигээн оройуонуттан 10 ийэ туһунан суруйуулар киллэриллибиттэрэ буолар. Үбүлээһинин оройуон дьаһалтата уйуммут. Кинигэ С.А.Новгородов аатынан «Айар» кинигэ кыһатыгар 2023 сыл бүтүүтэ бэчээттэммитэ. Сакааһынан таһаарар эрэдээксийэ үлэлэһэн бу кинигэҕэ өрөспүүбүлүкэ араас оройуоннарыгар олорор күн-күбэй ийэлэр тустарынан кэпсиир истиҥ-иһирэх ыстатыйалар, ахтыылар чугас дьонноро өйөбүллэринэн, үбүлээһиннэринэн киллэриллибиттэр, ол иһин норуот кинигэтэ диэн ааттаах. Жанрын быһыытынан – бу энциклопедическай хабааннаах таһаарыы.
Кинигэ сүрэхтэниитин оройуон дьаһалтатын дьыалаларын дьаһайааччы Анна Федорова иилээн-саҕалаан ыытта. Саҕаланыытыгар «Айар” кыһа сакааһынан үлэлиир эрэдээксийэтин эрэдээктэрэ Сайыына Лыткина кинигэ туһунан кэпсээтэ, ыстатыйа автордарыгар, кинигэ тахсыытын үбүлээбит Эдьигээн оройуонун дьаһалтатыгар махтанна. Норуот кинигэтигэр күн-күбэй ийэлэр Иванова Александра Васильевна, Иванова Мария Васильевна, Коваль Мария Захаровна, Митясова Елизавета Иннокентьевна, Наумова Екатерина Гаврильевна, Николаева Татьяна Васильевна, Павлова Акулина Григорьевна, Павлова Екатерина Григорьевна, Федотова (Ксенофонтова) Евдокия Прокопьевна, Филиппова Александра Семеновна тустарынан иһирэх ахтыылар киирэннэр, ааттара үйэтитилиннэ.
Бу күн кинигэҕэ киирбит ийэлэр оҕолоро Зоя Макаровна Иванова, Тамара Егоровна Камбарбаева, Людмила Михайловна Николаева, Клара Николаевна Филиппова, Наталья Дмитриевна Никифорова, Николай Дмитриевич Никифоров ийэлэрин ахтан-санаан аастылар, саҥа тахсыбыт «Ийэҕэ махтал- в благодарность Матери» кинигэни бэлэх туттулар. Кинигэ5э ийэлэрин ааттарын киллэртэриигэ үлэлэспит Августина Жирковаҕа махталларын тиэртилэр.
