Лариса уонна Прокопий Захаровтар дьиэ кэргэннэрэ 2013 сыллаахха Эбээн-Бытантайга үөскээбитэ.Утуу-субуу о5олор күн сирин көрөн, билигин кинилэр биэс о5олоохтор. Ыал буоллахтарын утаа төрөппүттэрин кытта олорбуттара. Онтон кыыс дойдутугар Кыстатыамҥа көһөн кэлэн баран, элбэх оҕолоох дьиэ кэргэн сиэринэн дьиэ туттарга быһаарыммыттара.
— Бу сылга саҥа дьыл эрэ иннинэ дьиэбитигэр көһөн киирбиппит. Онон сайын тиэргэммэр быйыл аан бастаан бэйэм илиибинэн тутан-хабан сибэкки олортум. Петуниялары, бархатцы сибэккилэр ситэннэр үөрдүм аҕай. Саас дьоҕус теплица туттубуппут. Онон эмиэ аан бастаан оҕурсуу үүннэрдим, айахпытыгар добуоччу сиэтибит.Мантан ыла дьарыктаныам диэн сананным. Бэйэм дьиҥэ тыа хаһаайыстыбатын академиятын кэтэхтэн бүтэрбитим. Агроном идэлээхпин. Ол гынан баран ол идэбинэн манна үлэ көстүбэт, — диэн кэпсиир Кыстатыам олохтооҕо эдэр ийэ Лариса Захарова.
Эдэр ыаллар Захаровтар дьиэлэрин үс сыл устата бэйэлэрин кыахтарынан туттубуттара. Онуоха ийэ хапытаалын харчыта улаханнык туһалаабыта, чугас дьонноро көмөлөспүттэрэ. Ону сэргэ эдэр ыалларга аналлаах программанан субсидияны туһанарга кыах ылбыттара.
Ыал улахан уола Сергей 9 кылааска үөрэнэр. Тустуунан, чэпчэки атлетиканан дьарыктанар. Иккис уол Ваня 3 кылаас үөрэнээччитэ, хапсаҕайы, тустууну сэргиир. Соҕотох мааны кыыстара Инесса 2 кылаас үөрэнээччитэ, төһө да кыра буоллар, дьиэҕэ-уокка ийэтин бастакы көмөлөһөөччүтэ. Проня детсад иитиллээччитэ уонна кырачаан Захар 8 ыйдаах.
Ларисалаах Прокопий нэһилиэк олоҕор көхтөөхтүк кыттар дьон. Аҕалара Прокопий сезоннай үлэҕэ сылдьар. Кыстатыамҥа кэллэҕинэ бултуур, балыктыыр, үчүгэй спортсмен. «Хотугу хоһуун» оройуоннааҕы күрэх хас да тегүллээх кыттыылааҕа уонна призера. Лариса Ивановна олохтоох детсадка завхоһунан үлэлиир. Билигин кыра оҕотун көрөн олорор. Ылба5ай куоластаах буолан. сценаттан түспэт. Кулуупка буолар дьаһалларга актыыбынайдык кыттар.
— Элбэх оҕолоох ийэ сиэринэн бурдук аһы астыырбын сөбүлүүбүн. Билигин о5обун көрөн олорор буолан, саҥа дьиэбин-уоппун бэрийэбин. Уолаттарбытын айыл5а5а сыһыаран иитэбит. Манна а5абыт оруола улахан. Итиэннэ ийэбэр иитээччи идэлээх Мария Сергеевна Васильева5а о5олорбун иитэрбэр күүс-көмө буоларыгар наһаа махтанабын. Кини сабыдыалынан о5олорум кыра саастарыттан төрүт культураларыгар сысталлар. НПК -ларга кытталлар. Инессам кыра эрдэ5иттэн куукулаларыгар таҥас тигэ үөрэнэн, иискэ бэйэбинээ5эр ордук сыстыах курдук. Билигин оскуола5а быысыбайдааһын куруһуогар дьарыктанан эрэр, — диир эдэр ийэ.
Лариса Ивановна уомул балыгыттан оҥорор рулет рецебин үллэстэр.
Духуопкаҕа буспут балыктан рулет
Састааба:
— балык чыыр эбэтэр уомул
— моркуоп 1уст
— луук
— майонез
— туус
— хара перец
Балыкпытын ыраастыыбыт, унуохтарын барытын ылабыт уонна үчүгэйдик сууйабыт. Туустаах переһинэн балыкпыт ис өттүн сотобут уонна кыратык туруора түһэбит.
Начинкатыгар анаан луукпутун кыра гына кырбастыыбыт, моркуоппутун теркалыыбыт уонна кыра мас арыытыгар ыһаарылыыбыт .
Балыкпыт үрдүгэр начинкабытын чараас гына тэлгиибит уонна кутуругуттан саҕалаан төбөтүгэр диэри рулет гынан эрийэбит. Арахса сылдьыбатын гына сабынан баайабыт. Үрдүн майонеһынан сотобут. Эрдэттэн 180° сылытыллыбыт духовка5а 25 мүн буһарабыт. Буһан тахсыбытын кэннэ үрдүн мас арыытынан сотуохха сөп.