Аан дойду үрдүнэн кэрэ аҥардар күннэрин көрсө уһуйааннарга номнуо сааскы бастакы тэрээһиннэр саҕаланнылар. Уһуйаан иитиллээччилэрэ ийэлэригэр, эбэлэригэр, эдьиийдэригэр анаан эҕэрдэ кэнсиэртэрин бэлэх ууналлар. Онтон Эдьигээннээҕи «Дэвэлчэн» уһуйаанын «Туксакил» кырачаан оҕолор бөлөхтөрүн ийэлэригэр аналлаах маастар-кылаас ыытылынна.
«Туксакил» бөлөх иитээччилэрэ Ньургуяна Афанасьевна Копылова уонна Дарья Дмитриевна Пестрякова иитиллээччилэрин ийэлэригэр анаан ураты тэрээһини тэрийдилэр. Ол курдук, Эдьигээннээҕи оҕо искусствотын оскуолатын уһуйааччыларын Анна Владимировна Иванованы, Наталья Александровна Вензели, Александра Владимировна Васильеваны ыҥыран, “монотипия” техниканан уруһуйга маастар-кылаас ыыттардылар. Маастар-кылааска сылдьан ийэлэр күннээҕи түбүктэн сынньанан, аралдьыйан, кэрэ эйэгэтигэр уһуйулуннулар. Тэрээһинтэн астынан, бэйэлэрэ оҥорбут хартыыналарын бэлэх ылан тарҕастылар.