Ыам ыйын 3 күнүгэр Кыстатыам нэһилиэгин «Туйаара» оҕо уһуйааныгар «Үлэ барыта бочуоттаах, үлэ барыта үчүгэй» диэн ааттаах тэрээһин буолан ааста. Бу дьаһал оҕолор идэ туһунан билиилэрин кэҥэтиигэ, идэ туһатын өйдөтүүгэ ананна.
-Бу күн улахан бөлөх иитиллээччилэрэ таҥас-сап кэтэн, сэп-сэбиргэл тутан космонавт, повар, тутааччы, учуутал онтон да атын идэлэри үҥкүүлээн көрдөрдүлэр. Орто бөлөх оҕолоро литературнай монтаж толордулар. Кыра бөлөх иитиллээччилэрэ эҕэрдэ үҥкүүлэрин бэлэх ууннулар.
Онтон мин ыҥырыылаах ыалдьыт быһыытынан тиийэн бэйэм идэм туһунан кэпсээтим. Олоҕум устата үлэлээбит сылларбын кэрэһэлиир хаартысканан альбоммун көрдөрдүм. Үлэһит киһи мэлдьи чиэскэ, бочуокка сылдьар диэн, үтүө үлэһит дьон туһунан кинигэлэри көрдөрдүм. Оҕолор олус сэргээн көрдүлэр-иһиттилэр. Оскуола иннинээҕи бөлөх иитиллээччитэ Бугаева Оля библиотекарь идэтин хайдах өйдүүрүн туһунан кэпсээтэ. Эрдэ уһуйаан иһинэн кинигэ оҥоруутун күрэҕэ биллэриллибитэ. Любовь Иннокентьевна, Анна Георгиевна уонна мин дьүүллүүр сүбэҕэ киирэммит кинигэ арааһын көрдүбүт, сыаналаатыбыт. Оҕолор төрөппүттэрин кытта араас кинигэлэри олус кыһаллан туран, айымньылаахтык оҥорбуттар диэн сөхтүбүт-махтайдыбыт. Бу үлэлэр оҕону иитэр-үөрэтэр, билиилэрин хаҥатар сыаллаах-соруктаах оҥоһуллубуттар. Түмүккэ дьүүллүүр сүбэ быһаарыытынан
«Бастыҥ онньуур кинигэ» хайысхаҕа кыайыылааҕынан Семёнов Эрхан буолла, иккис миэстэ — Семёнов Харысхан.
«Үөрэтэр кинигэ» хайысхаҕа кыайыылааҕынан Захаров Проня
ааттанна, иккис миэстэ — Семенова Сансара. “Ыйан биэрэр кинигэ”
хайысхаҕа бастакы миэстэни Элляев Сулустаан, иккис миэстэни — Васильев Коля ыллылар. «Дьикти кинигэ» хайысхаҕа кыайыылааҕынан Сергеева Лея таҕыста, иккис миэстэҕэ Ермолаева Алексина тигистэ.
“Авторскай кинигэ”
хайысхаҕа кыайыылааҕынан Васильев Арсентий, иккис миэстэ Колтовская Күннэй буоллулар. “Мин уонна айылҕа” хайысхаҕа Николаев Адриан кыайыылааҕынан ааттанна. Кыайыылаахтарга уонна миэстэҕэ тиксибиттэргэ өйдөбүнньүк грамота туттарылынна. Бу күн оҕолор остуоруйа да иһиттилэр, түмүккэ өссө оҕолор бэйэлэрэ оҥорбут сибэккилээх оҥоһуктарын бэлэх ууннулар.
Бу тэрээһини иитээччи Арина Ивановна Бугаева салайан ыытта.
Тэрээһин сыалын-соругун ситтэ, идэ туһунан оҕолорго үтүө өйдөбүлү хаалларда диэн бигэ эрэллээхпин, — диэн иһитиннэрдэ библиотекарь Анна Гоголева-Семенова.