«Мобильный доктор» өрөспүүбүлүкэтээҕи бырайыагынан сэтинньи 3-5 күннэригэр Кыстатыам нэһилиэгэр оҕо быраастара кэлэн үлэлээтилэр. Үс күн иһигэр быраастар нэһилиэк оҕолорун туруктарын 100% хабан көрдүлэр-иһиттилэр, сүбэ-ама биэрдилэр. Бу күннэргэ үлэ чааһын кэнниттэн быраастарбыт нэһилиэк ыччатын кытта волейболга уонна “Көрдөөх стартка” күрэхтэстилэр. Салгыы атын нэһилиэккэ айанныыр күннэригэр олохтоохтор быраастарга махтанан туран тыл эттилэр, бэлэх- туһах туттардылар уонна ылбаҕай ырыаларын анаатылар.
Оскуола-уһуйаан директора Людмила Ильинична Ефимова махтанан туран, быраастар биригээдэлэрин салайааччытыгар Татьяна Николаевна Бурцева хомуйан таһааттарбыт «Кыстатыам» диэн кинигэтин бэлэх уунна. Салгыы кулууп директора Сергеева Н.Н., ФАП мед.сестрата Константинова Е.Н., общественник Григорьева М.И. тыл эттилэр.
Ол кэннэ маҥан халааттаах аанньалларбыт үлэлииргэ, олорорго бары усулуобуйаны тэрийбит, истиҥник-иһирэхтик көрсүбүт олохтоох дьаһалта баһылыгар Артур Константинович Ильиновка, оскуола-уһуйаан коллективыгар, минньигэс аһынан күндүлээбит повардарга Татьяна Ивановнаҕа, Раиса Николаевнаҕа, тастан кэлэн көмөлөспүт кыргыттарга Саргылана Николаевнаҕа, Екатерина Дмитриевнаҕа, нэһилиэк түмэлигэр сырытыннарбыт, нэһилиэк олоҕун сырдаппыт Татьяна Николаевна Бурцеваҕа уонна балыыһа медсестратыгар Евдокия Николаевна Константиноваҕа барҕа махтал тылларын тиэртилэр. Мобильнай биригээдэ аатыттан уролог быраас Иван Васильевич Туприн «Аныыбын эйиэхэ ис сүрэхтэн тахсар тылларбын» диэн ырыаны бэлэх уунна. Ол кэмҥэ биригээдэ кэрэ аҥардара нарын-намчы үҥкүүнү толорон ырыаны өссө киэргэтэн биэрдилэр. Түмүккэ уопсай хаартыскаҕа түһүү буолла, бу түгэҥҥэ быраастарбыт «Кыстатыамҥа махтал» диэн суруктаах былакааттарын өрө туттулар. Маны этэн эрдэхтэрэ бириэмэни туһалаахтык, умнуллубаттык, бэйэ-бэйэҕэ истиҥник сыһыаннаһан атаарыы диэн.
Автор: Надежда Сергеева, общ. корр.