Кулун тутар 8 күнүгэр Кыстатыам эр дьоно түмсэн, кэрэ аҥардарга концерт туруордулар. Быйыл хаһааҥҥытааҕар да элбэх сибэкки дьөрбөтө дьаһалта аатыттан туттарыллан, толору саала кэрэ көстүүнэн симэннэ. Концеры дьаһалта специалиһа Антон Гоголев салайан ыытта. Тимур Устинов салайааччылаах ОДЬКХ учаастагын үлэһиттэрэ, Иван Васильев, Степан Захаров, Валерий Семенов, оскуола үөрэнээччилэрэ ырыаларынан-тойуктарынан кэрэ аҥардары сэргэхситтилэр.
Кэнсиэр кэмигэр оҕуруонан симээһини баһылаабыт Инна Сергеева коллекциятын көрдөрөн, биһирэбили ылла. Сценаҕа биир сонун тахсыынан оскуолаҕа ыытыллыбыт “Кыстатыамчаан Куо» күрэх кыайыылааҕын 1 кылаас үөрэнээччитин Милана Захарованы билиһиннэрии буолла. Кинини оҕолор Сайсары-Куо, Аскалон, Вася бэртээхэй ырыаларынан өйөөтүлэр. Кэнсиэри кыттыбыт эр дьон бары тахсан, “Хонон ааһыый, хоноһо» ырыанан түмүктээтилэр.
