Сэтинньи 29 күнүгэр Кыстатыамҥа биир сонун сэргэх тэрээһин буолан ааста. Ол эбэтэр общественник Мария Ивановна Григорьева 65 сааһын туолбутун бэлиэтээн олох атын халыыптаах дьоро киэһэни көҕүлээтэ. Бу күн “Нулгин” кулууп сценатыгар мэлдьи дьон ортотугар сылдьан, нэһилиэк олоҕун иилиир-саҕалыыр депутат кэрэ аҥардар күрэскэ кытыннылар.
Конкурсу көҕүлээбит киһибит –Мария Ивановна үлэһит буолуоҕуттан хайа да кэмҥэ общественнай үлэттэн туора турбатах нэһилиэк ытыктанар далбар хотуна. Кини олоҕо-дьаһаҕа барыта төрөөбүт Кыстатыамын кытта сибээстээх. Оскуола кэнниттэн Алданнаа5ы медицинскэй училищены бүтэрэн, эмчит идэтин баһылаан, 46-с сылын Кыстатыамнааҕы оҕо уһуйааныгар кырачааннар доруобуйаларын туһугар туруулаһар. Ити сыллар устата комсомольскай секретарынан, профсоюзнай үлэнэн, хас да созывка нэһилиэк депутатынан талыллан, аҕыйах ахсааннаах хотугу норуоттар ассоциацияларын Кыстатыамнааҕы отделениетын тэрийэн, общественнай олох инники күөнүгэр сылдьар. Дэлэҕэ 2011 сыллаахха Ил Түмэн олохтоох бэйэни салайыныыга сис комитета уонна дьахтар парламентарийдар общественнай политическай кулууптара ыытар “ Женшина-лидер» өрөспүүбүлүкэтээҕи күрэҕэр арктическай муниципальнай тэриллиилэрин депутат –дьахталларын ортотугар маннык үрдүк ааты ылыа дуо. Кыстатыам төрүт-уус табаһыт ыалларын уолларыгар Ильинов Константин Аполлоновичка кэргэн тахсан, үс о5ону улаатыннаран, үлэһит оҥортоотулар. Оҕолоро эмиэ төрөөбүт дойдуларын олоҕун оҥорсо сылдьар дьоһун дьон, бары ыаллар. Улахан уол Юрий Констатнтинович өбүгэлэрин төрүт дьарыктарын салҕыыр табаһыт, булчут, балыксыт, Артур Константинович – Кыстатыам эбэҥки нэһилиэгин баһылыга, Варвара Константиновна –Кыстатыам оскуолатын саха тылыгар уонна литературатыгар учуутала.
түөрт депутат дьахтар кыттыылаах күрэх түһүмэхтэринэн барда. Бастакы түһүмэххэ кыттааччылар бэйэлэрин түөлбэлэрин олохтоохторун, ситиһиилэрин, олохторун-дьаһахтарын слайдалары көрдөрөн, сиһилии кэпсээтилэр. Иккис түһүмэх нэһилиэк историятын билиини тургутуу буолла, маныаха библиотекарь Анна Семенова-Гоголева олус интэриэһинэй боппуруостары бэлэмнээбитин бэлиэтиэххэ наада. Депутаттарбыт бары да история кэрчиктэрин балачча билэллэрин көрдөрдүлэр. Анна Николаевна өссө республика лидер дьахталларын туһунан бэлэмнээбит быыстапкатын кэпсээтэ. «Депутат хараҕынан” диэн үһүс түһүмэххэ кыттааччылар бөһүөлэктэрин инники сайдыытыгар ыра санаа оҥостор көрүүлэрин дакылаат оҥорон,плакаттарга уруһуйдаан, сорохторго оҕолор уруһуйдаан көмөлөстүлэр, мустубут дьон иннигэр көмүскээтилэр. Салгыы деловой таҥаска. этикеккэ аналлаах түһүмэх буолла. Дьэ уонна бүтэһигинэн музыкальнай дьоҕуру көрүү түһүмэҕэ ордук элбэх сэргиир ытыс таһыныытын хомуйда. Маныаха Наталья Михайловна Иванова чабырҕахтаан соһутта. Лена Эдуардовна Семенова төрүкү да ырыаһыт буолан, бииргэ үөрэммиттэрин кытта ыллаан дьиэрэттэ. Оттон учуутал идэлээх Туйаара Трофимовна Винокурова хомустаан да ылла, тойук да иһитиннэрдэ, уокуругун дьонун сыанаҕа таһааран оһуохайдатта. Татьяна Ивановна Ермолаева хотугу дьахтар быһыытынан иискэ олус сыстаҕас, төрүт омугун хаанын киллэрэн, уокуругун иистэнньэҥ дьахталларын тумэ тардан, эбэҥкилии ырыалары, эргиир уҥкүүлэрин толордулар.Оттон дьүүллүүр сүбэҕэ Мария Ивановна бэйэтэ, физкультура учуутала Горохов Владимир Дмитриевич, дьаһалта үлэһитэ Сивцев Сергей Петрович үлэлээтилэр. Кинилэр быһаарыыларынан маннык түмүк таҕыста: Туяра Винокурова- -депутат-интеллектуал, Лена Семенова- депутат тэрийээччи,Наталья Иванова — депутат-наставник ааттар иҥэрилиннилэр. Кыайыылааҕынан Татьяна Ермолаева тахсан, “Женщина-лидер-2024”ү рдүк ааты ылла.
Бу дьоро киэһэҕэ Ил Түмэн депутата, хотугу аҕыйах ахсааннаах норуоттар дьыалаларыгар сис комитет председателэ Голомарева Е.Х.,Эдьигээн оройуонун дьаһалтатын, улуус депутаттарын мунньаҕа-Сугулаан эҕэрдэ суруктара туттарылыннылар, төрөөбүт нэһилиэгин дьаһалтата “Кыстатыам нэһилиэгин бочуоттаах олохтооҕо” диэн ааты иҥэрдэ
.
