Быйылгы Россияҕа педагог уонна наставник сылыгар Кыстатыамнааҕы “Туйаара” уһуйаан төрүттэммитэ 65 сылын туолла. 1958 сыллаахха балаҕан ыйын 4 күнүгэр детсад аана тэлэччи аһыллан, нэһилиэк олоҕор, төрөппүттэргэ күүс-көмө, тирэх буолан баччаҕа тиийэн кэллэҕэ. Бэлиэ даата өссө государственнай, общественнай деятель Шемяков Н.В. 110 сыла туоларын кытта эмиэ сибээстээх. Ити кэмҥэ Николай Васильевич Ленин аатынан колхоз парткомун босхоломмут секретарынан үлэлээн, детсад кыаҕын ылан үлэлииригэр ураты болҕомтотун уурбута. Саҥа үөрэх сыла саҕаланыыта балаҕан ыйын устата уһуйаан иитээччилэрэ араас хабааннаах дьаһаллары тэрийдилэр. 65 сыл устата араас элбэх оҕо иитээччилэр сылаас илиилэригэр бигэнэн, сымнаҕас сыһыаннарыгар угуттанан билии ылбыттара, араас сатабылга уһуйуллубуттара.
Балаҕан ыйын 25-29 күннэригэр оҕо саадпытыгар үбүлүөйүнэй тэрээһиннэр былааннанан аастылар. Бэнидиэнньиктэн саҕалаан оҕо саад историятын сырдатар “Хаартысканан история”, урукку оҕо сааспытын санатар оонньуур быыстапката “Оҕо- оҕо эрдэххэ” кэккэлэһэн турдулар. Иитээччилэр оҕолору кытта тэҥҥэ оҕо саада төрөөбүт күнүн араас тэрээһини ыытан бэлиэтээтилэр. Көрдөөх-нардаах спортивнай курэхтэһии “Бырааһынньыкка бэлэмнэнэбит”, ырыа- тойук аргыстаах музыкальнай аралдьыйыы “Төрөөбүт күнҥүнэн, оҕо саадым!”, квест оонньуу “Табанан айан”.
Балаҕан ыйын 27 күнүгэр – Иитээччи уонна оҕо саад үлэһиттэрин идэлээх бырааһынньыктарын күн сарсыардаттан төрөппүттэр, оҕолор эҕэрдэ сурук, бэлэх тутуурдаах субурустулар. Бөлөхторүнэн “Төрөөбүт күнҥүнэн, оҕо саадпыт!” диэн фотозоналар туран киэркэйдилэр. Нэдиэлэбит сүрүн бөлөҕүнэн күрэҕэ “Мин иитээччилэрбинээн” буолла. Үлэлэригэр олус кыһамньылаах иитээччи көмөлөһөөччүлэрэ, идэлэригэр бэриниилээх иитээччилэр уонна кыракый иитиллээччилэр бу күрэххэ билиилэрин көрдөрдүлэр, айар дьоҕурдарын, талааннарын арыйдылар. Төрөппүттэр көмөлөрүнэн үбүлүөйдээх күһүнҥү бүлүүдэлэри көмүскээтилэр. Ол кэннэ нэһилиэк баһылыга Ильинов Артур Константинович ветераннарга, общественниктарга, оскуола директорын э.т. Сергеева Анастасия Николаевна Улуус үөрэҕириитин управлениетытан аатыттан үлэлэригэр ситиһиилээх, өр кэмҥэ үлэлээбит үлэһиттэргэ Бочуотунай грамоталары, Махтал суруктары туттардылар. Бөһүөлэкпит библиотекара Гоголева-Семенова Анна Николаевна эҕэрдэ тыллаах, сэмэй бэлэхтээх кэллэ, ыччат лидерэ Семенова Матрена Дмитриевна нэһилиэк культурнай эйгэтигэр активнайдык кыттар эдэр ийэлэргэ эҕэрдэ суругун туттарда, музыкальнай бэлэҕин тиэртэ.
Сана тахсыбыт №2 нүөмэрдээх “Туйаара” хаһыат үөрүүлээх быһыыга-майгыга нэһилиэк уонна оскуола библиотекаларыгар туттарылынна. Бу хаһыакка сааскы үбүлүөйдээх тэрээһиннэри кыракый кэрчик сонуннаан кэпсээтибит, балаҕан ыйдааҕы үлэни хаартысканан таһаардыбыт, Чурапчыга буолбут XIX өрөспүүбүлүкэтээҕи педагогическай дьаарбаҥкаҕа ситиһиилэрбитин сырдаттыбыт. 2021с. дистанционнай үлэ кэмигэр «Балыктан бүлүүдэ» күрэххэ кыттыбыт төрөппүтү кытта оҕолор үлэлэрин туспа балаһанан киллэрдибит.