Бүгүн, балаҕан ыйын 2 күнүгэр Лииндэ ситэтэ суох орто оскуолатыгар Билии күнүн бэлиэтээтилэр. Быйылгы үөрэх дьылыгар бу кыһаҕа уопсайа 25 үөрэнээччи Билии аартыгын аанын арыйда, олортон маҥнайгы кылааска 5 үөрэнээччи киирдэ. Оскуола боруогун аан бастаан атыллаабыт кырачааннары Наталья Юрьевна Болтунова үөрэтиэҕэ.
Тэрээһин маҥнайгы кылааска үөрэнэ киирбит кырачааннары үөрэ-көтө көрсүүттэн, чиэстээһинтэн саҕаланна. Салгыы дьаһал кыттыылаахтара Арассыыйа уонна Саха сирин Өрөгөй ырыатын толордулар. Үөрүүлээх быһыыга-майгыга оҕолору, оскуола коллективын, төрөппүттэри Лииндэ нэһилиэгин баһылыга Николай Антонов саҥа үөрэх дьыла үүммүтүнэн эҕэрдэлээтэ, баҕа санаа бастыҥын тиэртэ. Нэһилиэк, оскуола-уһуйаан дьаһалталара, урбаанньыт Гурьев В.Н., Лииндэ оскуолатын боруогун үйэ аҥарын анараа өттүгэр атыллаабыт выпускниктар ааттарыттан Линда Иванова уонна Изабелла Андреева маҥнайгы кылааска үөрэнэ киирбит оҕолорго бэлэхтэрин туттардылар. Ону сэргэ, СӨ Ил Дархана Айсен Николаевтан маҥнайгы кылаас оҕолоро икки судаарыстыбаннай тыллаах күннүгү (дневник) бэлэх туттулар.
Быйыл Лииндэ оскуола-уһуйааныгар саҥа салайааччынан Попов Григорий Ионович үлэлии кэллэ. Кини идэтинэн история учуутала эбит, бу иннинэ Марха оскуолатыгар (Дьокуускай куорат) үлэлээбит эбит. Тэрээһин кылаас чаастарынан түмүктэннэ.