Бүгүн « Азия о5олоро» Аан дойдутаа5ы спортивнай оонньуулар түмүк күннэрэ. Киэһэ 20 чаастан үөрүүлээх сабыллыытын көрүөхпүт. Эдьигээннээҕи оҕо спортивнай оскуолатын директора Александр Алексеев остуол тенниһигэр Россия таһымнаах судьуйа. Онон кинини араас таһымнаах күрэхтэһиилэргэ судьуйа быһыытынан ыҥыраллар. Бу да сырыыга «Азияоҕолоро» оонньуу кэмигэр остуол тенниһигэр күрэхтэһиилэри судьуйаласта. Ол быыһыгар Эдьигээн оройуонуттан кыттыбыт спорсменнарын өйөөтө, кинилэр киирсиилэрин кэтээн көрдө. Кинилэр ситиһиилэриттэн педагог киһи быһыытынан дуоһуйа үөрдэ, астынна.
-Быйылгы Азия оҕолорун Норуоттар икки ардыларынааҕы спортивнай оонньуулар тэрээһиннэрэ үрдүк таһымнаах. 24 көрүҥҥэ спортивнай күрэхтэһиилэр таһынан, араас культурнай дьаһалларынан толору буолла. Эдьигээнтэн үс оҕо ситиһиилээхтик кыттан, биир дойдулаахтарын олус үөртүлэр. Бу оҕолор кыра саастарыттан Эдьигээннээҕи оҕо спортивнай оскуолатыгар секцияларга дьарыктанан, бэйэлэрин спорка дьулуурдарын, талааннарын көрдөрөн салгыы бу дьоҕурдарын сайыннарар сыалтан киин улуустарга үөрэнэ сылдьаллар.
Ол курдук, Портнягин Артур быйыл Нам улууһун Хамаҕатта орто оскуолатын 9 кылааһын ситиһиилээхтик үөрэнэн бүтэрдэ. Артур волейболга дьоҕурун оҕо спортивнай оскуолатын волейболга тренерэ Ильинов Александр Александрович бэлиэтии көрбүтэ. Онтон кэпсэтии ыытан, 2022 сыллаахха Намнааҕы Олимпийскай резервэ спортивнай оскуолатыгар, старшай тренер Жерготов Айсен Ельфидифоровичка үөрэттэрэ ыыппыппыт. Артур утумнаахтык дьарыктанан бэйэтин саастыылаахтарыгар Саха Сирин сүүмэрдэммит хамаандатыгар киирэн, элбэх үрдүк таһымнаах күрэхтэһиилэргэ ситиһиилээхтик кыттан «Азия оҕолоро» Норуоттар икки ардыларынааҕы спортивнай оонньууларыгар кыттар быраабы ылбыта. Манна даҕатан эттэххэ Артур бииргэ төрөөбүт игирэтин аҥаара Богдан Портнягин Хотугу многоборьенан утумнаахтык дьарыктанар, тренерэ Шадрин Алексей Алексеевич. Бу 2024 сылга Саха Сирин сүүмэрдэммит хамаандатыгар киирэн, Россияҕы бастыыр иһин күрэхтэһии чемпиона, маастарга кандидат. Бу оҕолор спорка ситиһиилэригэр кинилэри кыра саастарыттан спордунан дьарыктаналларын өйүүр, күүс-көмө ийэлэрэ Гульнара Алексеевна буоларын уонна кини оруола улаханын бэлиэтиир наадалаах.
Семенов Никифор Эдьигээҥҥэ кыра кылаастарга үөрэнэр кэмнэригэр тустуу секциятыгар утумнаахтык дьарыктаммыта. Кинини аан бастаан тустууга үөрэппит, уһуйбут тренердэрэ- Федор Викторович Иванов, Александр Валерьевич Корякин уонна Николай Николаевич Филиппов. 2021 сыллаахха Никифоры Д.П. Коркин аатынан Чурапчытааҕы республиканскай олимпийскай эрэллэри бэлэмниир орто интернат-оскуолатыгар тренер Корякин Виталий Валерьевичка үөрэттэрэ ыыппыттара, тренеринэн уол биир дойдулааҕа, 2008 сылгакөҥүл тустууга Пекиннээҕи Олимпиада кыттыылааҕа Корякин Виталий Валерьевич буолар. Тренерэ Никифоры бу сылларга элбэх араас таһымнаах күрэхтэһиилэргэ бэлэмнээн сырытаннарда. «Боотурдар оонньуулары» икки тегүллээх чемпиона, Павел Пинигин аатынан күрэхтэһиигэ иккис миэстэ. Киргизияҕа Талас куоракка күрэхтэһиигэ бастакы миэстэ, 2023 сылга республикаҕа 2008-09 с. төрүөх уолаттар ортолоругар спартакиадаҕа иккис миэстэ уонна да атын элбэх республиканскай күрэхтэһиилэр чемпионнара, призердара. Азия оҕолорун Норуоттар икки ардыларынааҕы спортивнай оонньууларыгар Никифор Уһук Илин Федеральнай уокурук сборнай хамаандатыттан кытынна уонна чаҕылхай тустууну көрдөрөн чемпион үрдүк аатын ылары ситистэ. Түгэнинэн туһанан Никифоры, кини төрөппүттэрин, тренерин Корякин Виталий Валерьевиһы уонна кини ситиһиитигэр бары сыһыаннаах дьону барыгытын эҕэрдэлиибин!
Филиппова Александра кыра сааһыттан спорка дьоҕурдааҕа биллибитэ. Кини Хотугу многоборье секциятыгар ситиһиилээхтик дьарыктаммыта. Спорка уһуйбут бастакы тренерэ Шадрин Алексей Алексеевич буолар. Шура дэгиттэр дьоҕурдаах, ол курдук кини дуобакка уонна остуол тенниһигэр үчүгэйдик оонньуур. «Спортивные Якутяне» оскуола оҕолорун республикатааҕы Спартакиадатыгар оройуон хамаандатыгар киирэн икки сыл ситиһиилээхтик оройуон чиэһин көмүскээтэ. Бэйэбит зонабытыгар былырыын бастакы уонна быйыл иккис миэстэ буолан кыайыылары ситиһэрбитигэр бэйэтин кылаатын киллэрсибитэ.
2023 сыллаахха Шураны аҕата, биһиги оскуолабыт тустууга тренерэ Николай Николаевич Олимпийскай резервэ училищетыгар тустуу салаатыгар киллэрбитэ. Шура биир сыл иһигэр тустууга чахчы дьоҕурдааҕын көрдөрөн республиканскай, региональнай уонна Норуоттар икки ардыларынааҕы күрэхтэһиилэргэ ситиһиилээхтик кыттан, бириистээх миэстэҕэ тахсыталаабыта: Агинскай куоракка буолбут Уһук Илин Федеральнай уокурук первенствотыгар 2 миэстэ, Санкт-Петербурга ыытыллыбыт Норуоттар икки ардыларынааҕы турнирга 3 миэстэ, Улан-Удэҕа аһаҕас турнирга 3 миэстэ. Азия оҕолоро Норуоттар икки ардыларынааҕы спортивнай оонньууларга Шура Алыш диэн тустуу национальнай көрүҥэр кыттара «Спортивные якутяне» спартакиада кэмигэр эрэ биллибитэ. Онон чахчы да, икки нэдиэлэ эрэ күүстээхтик бэлэмнэнэн, аан бастаан бэйэтин күүһүн боруобаланан көрдө уонна чемпион үрдүк аатын ылары ситистэ. Финалга утарсааччытын ыраастык кыайан, пъедестал үрдүкү үктэлигэр тахсан, Сахатын сирин дьонун-сэргэтин үөртэ. Шура бу үрдүк ситиһиитинэн төрөппүттэрин, тренерин Карамзина Александра Дмитриевнаны, кини-кыайыытыгар олук уурсубут бары дьону эҕэрдэлиибин!
Эдьигээммит оҕолоро бу үрдүк ситиһиилэриттэн дуоһуйдум, астынным, оройуон салалтатын, Эдьигээн оройуонун бары олохтоохторун эҕэрдэлиибин! Оҕолор инники сайдыыларыгар күүс-көмө буола туруохтара диэн эрэнэбин! Төрөппүттэргэ оҕолоргутун спордунан дьарыктаналларыгар көҕүлээн диэн ыҥырабын! Артур, Никифор уонна Александра оҕолорго үтүө холобур буолаллар, «Азия оҕолоро» оонньуулартан кынаттанан, спортка өссө үрдүк таһымҥа тиийдиннэр.