Кыстатыамҥа олохтоох энтузиаст, педагогическай үлэ ветерана Татьяна Бурцева көҕүлээһининэн Николай Шемяковка аналлаах музей бэйэтэ олоро сылдьыбыт дьиэтигэр тэриллибитэ. Олохтоохтор ытыктыыр биир дойдулаахтарыгар анаммыт музейы байытарга, харыстыырга болҕомтолорун уураллар. Сыллата Николай Шемяков төрөөбүт күнүн кытта музей күнэ сөп түбэһэринэн бу икки күнү тэҥҥэ тутан бэлиэтииллэр.
Ол үгэстэринэн быйыл ыам ыйын 22 күнүгэр Кыстатыам олохтоохторо музей уһаайбатыгар түмсэн, Пионерия,Музей күннэрин, Николай Шемяков төрөөбүт күнүн, Ньукуолуну бэлиэтээтилэр. Бу күн мустубут дьон музейга киирэн саҥа экспонаттары кытта билсистилэр, ол туһунан музей бас-көс киһитэ Татьяна Николаевна махтанан туран, кэпсээтэ. Ол курдук, Эдьигээн кыраайы үөрэтээччитэ Шадрина Мария Ивановна оройуон историятын кэпсиир бэйэтин кинигэлэрин бэлэх уунна. Ол иһигэр Никоай Шемяков туһунан кинигэ баар. Кыстатыам олохтооҕо Саввина Саргылана Николаевна урукку значоктары коврикка кэккэлэччи иилэн туттарбыт. Эдьигээнтэн Васильева Светлана Николаевна төрөппүттэриттэн хаалбыт иһиттэри уурар сундуугу ыыппыт. Корякина Прасковья Петровна урукку оҕолорго былдьаһыкка сылдьар фильмоскобы биэрбит. Советскай-партийнай үлэ ветерана Мария Архиповна Харитонова сахалыы орнаменнардаах көбүөрү, оҕуруонан сиэммит ат киэргэллэрин ууруна сылдьарын, бэлэх ууммут. Олох сабыс саҥа экспонаты экскурсия кэмигэр врачебнай амбулатория медицинскэй сиэстэрэтэ Евдокия Константинова туттарда. Ол курдук, биир дойдулаахтара норуот маастара Зоя Тимофеевна Аполлонова сарыыттан бэйэтэ оһуордаан-бичиктээн тикпит суумкатын музейга анаан-минээн ыыппыт.
