“Сэдэх экспонаттар” быыстапкаҕа Эдьигээн музейа кыттар

Кулун тутар 20 күнүгэр  Дьокуускайга  Емельян Ярославскай аатынан музейга “Сэдэх экспонаттар” диэн ааттаах быыстапка  арылынна. Манна  республика араас музейдарыттан  ураты историческай суолталаах экспонаттар тиэрдилиннилэр.  Быыстапка  музей уонна «Саха сирэ» хаһыат  холбоһуктаах бырайыактара буолар. Барыта  23 музейтан тиийбит  133 экспонат  көрдөрүүгэ туруорулунна.

Ол иһигэр Эдьигээннээҕи А.Я.Уваровскай аатынан историческай музейтан түөрт экспонат быыстапкаҕа кыттар.Ол курдук,  дьахтарга аналлаах тимиртэн оҥоһуллубут хаартан харыстанар  ачыкы (19 үйэ бүтүүтэ). Дьабакы бэргэһэ оройун киэргэлин, венецианскай оҕуруону хара сукунаҕа тиһэн оҥоһуллубут үлэни Третьякова Альбина Гаврильевна бэлэхтээбит. Оҕо кута (гнездо души ребенка), оҥоһуллубут матырыйааллара-туос, мас.Бу мал  Баахынайга төрөөбүт, олорбут  Соломонов Михаил Афанасьевичка сыһыаннаах, музейга кини кыыһа Надежда Михайловна тиксэрбит.  19 үйэ бүтүүтэ кэмҥэ тигиллибит билэ, оҕуруота таба иҥиириттэн хатыллыбыт сабынан иҥэриллибит.