Таатта улууһун Тыараһа нэһилиэгин Л.Н.Турнин аатынан «Алгыс» норуот айымньытын дьиэтэ уонна М.Н.Турнин аатынан Тыараһа орто оскуолата тэрийэр VII төгүлүн ыытыллар республикатааҕы «Тыыннаах тыл» кэпсээн ааҕыытын түмүктүүр түһүмэҕэ олунньу 27 күнүгэр күнүс 14.00 чаастан П.А.Ойуунускай аатынан Саха академическай тыйаатырын Алампа аатынан аччыгый саалатыгар ыытылынна. Бу күрэххэ Кылаан кыайыылаах үрдүк ааты сүктэ Эдьигээн орто оскуолатын 6 “а” кылааһын үөрэнээччитэ Айна Анисимова.
Быйылгы күрэскэ Таатта, Чурапчы, Томпо, Мэҥэ-Хаҥалас, Амма, Муома, Эбээн-Бытантай, Үөһэ Дьааҥы, Кэбээйи, Сунтаар, Эдьигээн, Горнай улууһуттан уопсайа 74 сайаапка киирбититтэн дьүүллүүр сүбэ киирбит үлэлэри сыныйан көрөн-истэн, түмүктүүр түһүмэххэ 34 оҕону талан ылбыт. Оҕолор үс бөлөҕүнэн кытыннылар: I бөлөх – уһуйаан саастаах оҕолор, II бөлөх – алын кылаас үөрэнээччилэрэ, III бөлөх – 5-11 кылаас үөрэнээччилэрэ.
Дьүүллүүр сүбэ барыларын истэн, ыраах улуустан кыттар оҕолор видеоларын көрөн, сыаналарын түмэн, ырытыы, дьүүллэһии кэннэ түмүгү таһаарда.
Күрэх кылаан кыайыылааҕынан Эдьигээн орто оскуолатын 6 “а” кылааһын үөрэнээччитэ Айна Анисимова буолла. Кини Д.К.Сивцев -Суорун Омоллоон “Ачаа саһаана” кэпсээнин ааҕан иһитиннэрдэ. Салайааччылара: Анисимова Н.Н., Турнина П.И.
-Мин бэйэм Таатта улууһуттан төрүттээхпин, Эдьигээн киин балыыһатыгар ийэм -Ньургуйаана Николевна терапевт бырааһынан ананан кэлэн үлэлии сылдьар. Эдьигээн орто оскуолатын 6 “а” кылааһыгар үөрэнэбин. Эрдэ Дьокуускайдааҕы “Айыы Кыһата” национальнай гимназияҕа үөрэммитим. Кыра оҕо эрдэхпиттэн саха литературатын, култууратын, фольклорун өрө тутабын. Мин үтүө сүбэһиттэрбинэн ийэм уонна эмиэ быраас идэлээх эдьиийим Парасковья Ивановна Турнина буолаллар. Эдьигээҥҥэ ыытыллар сахалыы тыыннаах тэрээһиннэргэ көхтөөх кыттыыны ылабын. Ордук сахалыы кэпсээннэри уустаан-ураннаан ааҕарбын сөбүлүүбүн. Күрэх түмүгүнэн «Тэтим» радиоҕа ыҥырыллан ыалдьыттаабыппыт, күрэх туһунан санаабытын үллэстибиппит. Үрдүк таһымнаах күрэххэ кыайаммын олус үөрдүм, долгуйдум, кынаттанным. Инникитин уран тыл маастара буолар баҕа санаалаахпын, — диэн кэпсээтэ Айна Анисимова.