Кырачаан Маша Винокурова 2 кылааска үөрэнэ сылдьан аан бастаан кулууп сценатыгар тахсан ыллаабыта. Оччолорго учууталлара Иосиф Николаевич Корнилов оҕолору балалайканан доҕуһуоллаан ыллатара.
- Бастакы толорбут ырыам чуораан туһунан этэ. Иосиф Николаевич кэргэнинээн интернат иитээччитэ Мария Афанасьевнаны кытта ыллыылларын наһаа сөбүлээн истээччибит. Учууталбыт баяҥҥа эмиэ наһаа үчүгэйдик оонньуура. Ононбиһиги көлүөнэ ыччаттар кинилэри көрөн, ырыаҕа уһуйуллубуппут чахчы. Оччотооҕу оҕолор бары да интернакка олордохпут дии. Кэргэним Иван Афанасьевич Васильев эмиэ ырыа куттаах киһи, оскуола саҕаттан ыллыыр. Ырыаны сөбүлүүрүм үлэбэр да, олохпор да көмөлөһөр. Били сэбиэскэй кэмҥэ этэллэрин курдук, “,Песня жить и строить помогает “, — диэн ахтар «Туйаара” оҕо саадын иитээччитэ Мария Васильева.
Мария Сергеевна Кыстатыам детсадыгар иитээччинэн 51-ис сылын үлэлии сылдьар. Аан бастаан кырачааннары кытта үлэтин 1973 сыллаахха саҕалаабыта. Оҕо детсад сааһыттан ыллаан-туойан, олоҕун устата ырыаны доҕор-атас оҥостор диэн санааны тутуһар. Мария Сергеевна уонна Иван Афанасьевич төрөппүт оҕолоро араас идэлэри талбыттара да буоллар, олохторугар ырыа аргыстаах дьон. Кыргыттара Инга, Катя, Лариса , уоллара Иван бары үчүгэй куоластаахтар, ырыаларынан-тойуктарынан дьон сэҥээриитин ылаллар. Күтүөттэрэ Иннокентий Колтовской, Прокопий Захаров эмиэ ырыаны биһириир дьон. Эбэлэрэ аны сиэннэрин, хос сиэннэрин ырыаҕа уһуйарга ылсар. Быйылгы Кыайыы күнүгэр уһуйааҥҥа ыытыллыбыт сэрии кэминээҕи ырыалары толорууга сиэннэрин -Ларисатын, Иванын уолаттарын уонна хос сиэнин Күннэй Колтовскаяны кытта “Хайыһары” ыллаан, бириискэ тиксибиттэрэ.
