Бүгүн саха киһитэ күөххэ үктэнэн, сайылыкка көһөр сааскы Ньукуолун күнэ. Олохтоммут үгэс быһыытынан, ыам ыйын 22 күнүгэр Эдьигээн нэһилиэгин дьаһалтата тэрийиитинэн оройуоннааҕы остолобуойга кэлбит дьону хаас миининэн күндүлээн, Ньукуоланы бэлиэтээтилэр.
«Хлебопекарня” ХЭТ үлэһиттэрэ быйылгы бултаммыт хаастары үргээн,лапсатын илиилэринэн оҥорон, миин буһардылар, алаадьы астаатылар, кымыс куттулар. Мустубут дьону нэһилиэк баһылыга Степан Портнягин Ньукуолунан эҕэрдэлээтэ. Кэлбит дьон тото-хана хаас миининэн күндүлэнэн, үлэһиттэргэ махтаннылар.
