Алтынньы 22 күнүгэр Эдьигээннээҕи улуустар икки ардыларынааҕы кырдьаҕастар уонна инбэлииттэр олорор дьиэлэригэр Аан дойдутааҕы Аҕам саастаах дьон күннэригэр аналлаах дьыкаада иитинэн эҕэрдэ кэнсиэрэ үрдүк таһымнаахтык ыытылынна.
Бу тэрээһин “Оһуор” эбээлэр түмсүүлэрин далбар хотуттара тэриллибиттэрэ 20 сылыгар эмиэ ананна. Бу күн интэринээт олохтоохторугар “Оһуор” эбээлэр түмсүүлэрин кыттыылаахтара сахалыы таҥастарын, киэргэллэрин кэтэн, симэнэн муода көрдөрдүлэр, талааннарын арыйдылар. Ону сэргэ, бу дьоро киэһэҕэ Александр Шадрин, Михаил Ефимов, Анатолий Иванов, Иван Васильев, Николай Никифоров, Зинаида Оконешникова, Борис Алексеев, Үһүс көлүөнэ оскуолатын кыттыылаахтара уонна интэринээт үлэһиттэрэ эҕэрдэ нүөмэрдэрин бэлэх ууннулар. Кинилэр толоруулара кырдьаҕас дьон дууһаларын таарыйан, олохторугар сэргэхсийиини эптэ.
Маннык тэрээһиннэр кырдьаҕас дьону сэргэхситэллэр, кинилэргэ үөрүү-көтүү түгэннэрин бэлэхтииллэр, олоххо интэриэстэрин үрдэтэллэр.