Балаҕан ыйын 20 күнүгэр Ильинов Артур Константинович «Кыстатыам» эбэҥки муниципальнай тэриллии баһылыгын дуоһунаһыгар үктэнэр сиэрэ-туома ыытылынна. Ол курдук, балаҕан ыйын 8,9,10 күннэригэр Кыстатыам нэһилиэгин баһылыгын талыы быыбарыгар үс кандидат турбутуттан 55,1% куолаһы ылан Ильинов А.К. кыайыылааҕынан тахсыбыта.
Тэрээһин президиумугар ыҥырылыннылар Эдьигээн оройуонун аҕа баһылыга В.Н.Сорокин, баһылык бастакы солбуйааччыта Д.Г.Татаринов, (Суглан) оройуоннааҕы депутаттар сэбиэттэрин бэрэссэдээтэлэ Ю.Е.Шамаев уонна СӨ үөрэҕириитин бэтэрээнэ Т.Н.Бурцева.
Салгыы 187 нүөмэрдээх быыбардыыр учаастак сэкирэтээрэ Захарова Л.И. хамыыһыйа быһаарыытын иһитиннэрдэ уонна Артур Ильинов баһылык буолбутун туоһулуур дастабырыанньаны туттарда.
Ол кэннэ эрдэ нэһиликкэ баһылыктаан олорбут, билигин улуустааҕы тыа хаһаайыстыбатын управлениятын салайааччытынан ананан үлэлии сылдьар С.И.Корякин эҕэрдэ тылын тиэртэ уонна Константин Ильиновка баһылык анал бэлиэтин биэрдэ.
Артур Константинович биир дойдулаахтарын итэҕэллэрин ылан, төрөөбүт нэһилиэгин салгыы тупсарарга-сайыннарарга андаҕар тылын эттэ. Салгыы Эдьигээн оройуонун баһылыга В.Н.Сорокин, баһылык бастакы солбуйааччыта Д.Г.Татаринов, (Суглан) оройуоннааҕы депутаттар Сэбиэттэрин бэрэссэдээтэлэ Ю.Е.Шамаев, Эдьигээн нэһилиэгин кылаабынай специалиһа Л.Э.Степанова, култуура уонна туризмы сайыннарыы отделын начальнига А.Д.Степанов, ыччат уонна спорт отделын салайааччыта П.О.Николаев эҕэрдэ тылларын эттилэр, бэлэхтэрин туттардылар.Түмүккэ саҥа талыллыбыт баһылык А.К.Ильинов махтанан туран харда тылын эттэ,- диэн иһитиннэрдэ биһиги хаһыаппыт общественнай корреспондена Надежда Сергеева.
