Ахсынньы 21 күнүгэр Баахынайга Лииндэ нэһилиэгэ төрүттэммитэ 100 сылыгар аналлаах тэрээһиннэр чэрчилэринэн «Баахынай хоһууна – 2025» күрэх буолан ааста. Бу күрэххэ 10 эр бэрдэ Эдьигээн, Кыстатыам уонна Баахынай нэһилиэктэриттэн кыттыыны ыллыллар. Ол курдук, Эдьигээнтэн Богдан уонна Артур Портнягиннар, Прокопий Иванов, Егор Горохов, Алкивиад Сорокин, Айаал Александров, Александр Горохов, Баахынайтан Василий Ильинов, Владимир Мандаров, Кыстатыамтан Сергей Захаров.
Тэрээһин алгысчыт Николай Попов-Ньукуу Аят уоту аһатыытынан, алгыстааһынынан саҕаланна. Баахынай нэһилиэгин олохтоохторо «Саха сирин нэһилиэктэрэ» сериянан бэчээттэнэн тахсыбыт «Лииндэ» кинигэттэн, оччотооҕу дьон олоҕун-дьаһаҕын инсценировкалаан көрдөрдүлэр, Айал Софронов эҕэрдэ ырыаларын бэлэхтээтэ, «Гарпанча» оҕо фольклорнай ансаамбыла ыллаан-үҥкүүлээн күрэх култуурунай чааһын киэргэттилэр. Бу күн нэһилиэк баһылыга Николай Антонов Баахынай аҕам саастаах дьонугар, ветераннарга «Лииндэ нэһилиэгэ тэриллибитэ 100 сыла» түөскэ анньыллар бэлиэлэри туттартаата, өр сылларга Баахынай нэһилиэгин салайан олорбут оройуон баһылыгар Василий Сорокиҥҥа «Лииндэ нэһилиэгин бочуоттаах олохтооҕо» үрдүк аат иҥэрилиннэ.
Бөҕөстөр бэйэни билиһиннэрии, куобахтааһын, ох саанан ытыы, мас тардыһыы, өһөс торбос, наартаны ойуу национальнай многоборье көрүҥнэригэр күөн көрүстүлэр. Күрэх кылаабынай судьуйатынан Эдьигээннээҕи оҕо спордун оскуолатын тренера Алексей Шадрин үлэлээтэ. Ол курдук, куобахтааһыҥҥа I миэстэни Богдан Портнягин, II миэстэни Прокопий Иванов, III миэстэни Алкивиад Сорокин ыллылар. Өһөс торбоско кыайыылааҕынан Айаал Александров, II миэстэҕэ Артур Портнягин, III миэстэҕэ Василий Ильинов таҕыстылар. Ох саанан ытыыга I миэстэҕэ Егор Горохов, II миэстэҕэ Александр Горохов, III миэстэҕэ Артур Портнягин тигистилэр. Мас тардыһыытыгар Айаал Александров тэҥнээхтэрин булбата, II миэстэ – Прокопий Иванов, III миэстэ – Артур Портнягин. Наартаны ойууга кыайыылааҕынан Богдан Портнягин, II миэстэ – Прокопий Иванов, III миэстэ – Сергей Захаров буоллулар. Хас биирдии көрүҥ аайы кыайыылаахтарга уонна призердарга харчынан бириистэр туттарылыннылар. Бастакы миэстэҕэ 5000 солк., иккискэ 3000 солк., үһүскэ 2000 солк.
Күрэх түмүгүнэн «Баахынай хоһууна» аат хаһаайынынан Айаал Александров ааттанна, бирииһэ 15 тыһ. солк. уонна кур бэлэх туттарылынна. Айаал Александров Горнай улууһуттан төрүттээх, Эдьигээн орто оскуолатыгар физкультура учууталынан үлэлиир, оҕолору мас тардыһыытыгар дьарыктыыр. Иккис миэстэҕэ Богдан Портнягин таҕыста, бирииһэ уон тыһ. солк., кини Нерюнгритааҕы «Арктика» оскуолатыгар үөрэнэр, хотугу многоборьенан дьарыктанар. Үһүс миэстэҕэ Прокопий Иванов тигистэ, бирииһэ биэс тыһ. солк., кини баһаарынай чаас байыаһа. Сергей Захаровка, Алкивиад Сорокиҥҥа, Артур Портнягиҥҥа, Егор Гороховка анал байыаннай дьайыы кыттыылааҕа, Баахынайтан төрүттээх Дмитрий Иванов туруорбут 40-нуу лиитэрэлээх бензины бэлэх туттулар. Баахынай нэһилиэгин баһылыгын Николай Антонов аймахтара уонна Ыстапаан сыдьааннара харчынан бириистэрин Баахынай эрэллээх ыччатыгар Ильинов Василийга туттардылар. Ону сэргэ анал бирииһи Владимир Мандаров бэлэх ылла.
Ыраахтан, чугастан кэлбит кыттааччылар олохтоохторго, ыалдьыттарга национальнай многоборье спорт көрүҥүн бырааһынньыгын бэлэхтээтилэр, тыҥааһыннаах киирсиилэри көрдөрдүлэр.
Лианна Иванова, Баахынай.