Алтынньы 2 күнүгэр «Сайдам» сынньалаҥ киинигэр Аҕа көлүөнэ күнүгэр аналлаах «Кэскилбит тирэхтэрэ — Аҕа көлүөнэ» диэн тематическай биэчэр ыытылынна. Бу күн «Күһүн бэлэҕэ» ас-үөл хомуурдара, кыстыкка бэлэмнэнии уонна «Талаан маанылааччылара» талаан күрэхтэрэ буоллулар. Кыттааччылар бары бииргэ көхтөөхтүк кыттан, талааннарын уонна дьоҕурдарын көрдөрдүлэр.
«Күһүн бэлэҕэ» соҕотуопка күрэҕэр 1 миэстэни Зоя Мусалямова, 2 миэстэ — Ирина Андреева, 3 миэстэ — Наталья Ильинова буоллулар. «Талаан маанылааччылара» диэн талаан күрэҕэр 1 миэстэни Мария Васильева ылла, 2 миэстэҕэ Ульяна Ильинова, 3 миэстэҕэ Татьяна Иванова тигистилэр. Күрэх кыайыылаахтара грамоталарынан уонна бэлэхтэринэн наҕараадаланнылар. Кыттыыны ылбыт дьоҥҥо туоһу суруктар туттарылыннылар. Дьүүллүүр сүбэ састаабыгар Тыва Республикатыттан «Земскай культура үлэһитэ» программанан кэлбит Куулар Аржана Радиковна нуучча тылын учуутала кытынна. Биэчэр ыраас, истиҥ дьүһүннээх буолла. Кыттааччылар ырыа ыллаан, кэпсэтэн-ипсэтэн, үөрэн-көтөн тарҕастылар .
Алтынньы 3 күнүгэр «Сайдам» киинигэр Иитээччи уонна Учуутал күннэрин көрсө «Иитээччи уонна учуутал — үтүө дьыала тутааччылара» диэн бэлиэ күннээх үөрүүлээх биэчэр ыытылынна. Ыалдьыттарга ырыа, хоһоон, көрдөөх оонньуулар уонна күрэхтэр ыытылыннылар, кыттааччылар үөрэ-көтө кыттыыны ыллылар. Биэчэргэ учууталларга уонна иитээччилэргэ үтүө үлэлэрин, кыһамньыларын уонна оҕолору иитиигэ киллэрбит кылааттарын иһин махтал тыллар этилиннилэр. Бары кыттааччылар үөрүү уонна үтүө санаа ылан тарҕастылар.