Баахынайга бэс ыйын 1 күнүгэр оҕо спортивнай былаһааккатыгар Оҕо көмүскэлин күнүгэр аналлаах «Самаан сайын кэлбитинэн» диэн оҕолорго тэрээһин бэрт көхтөөхтүк буолан ааста.
-Бырааһынньык үөрүүлээх арыллыытыгар Лииндэ нэһилиэгин дьаһалтата быйыл оскуоланы бүтэрэр оҕолорго сэмэй бэлэх туттартаата, маны таһынан уһуйаан оҕолоро оройуон, республика иһинэн ыытыллыбыт араас күрэхтэргэ кыттыбыттарын, кыайбыттарын туоhулуур суруктары, бэлэхтэри тутан үөрүүлэрэ үксээтэ. Салгыы нэһилиэк оҕолорун эҕэрдэ кэнсиэрэ буолла, талааннаах оҕолорбут көрөөччүлэр биһирэбиллэрин ыллылар. Ол кэннэ оҕо коляскатын, куукула коляскатын, велосипед, самокат, оонньуур массыынаны киэргэтэн күрэх кыттааччылара көлөлөрүн көрөөччүлэр уонна дьүүллүүр сүбэ иннигэр көрдөрдүлэр. Эбиэт кэннэ оҕолорго «Көрдөөх стартар” күрэх, мелынан уруhуйдааhын, батутка ыстаныы, аhаҕас халлаан анныгар дискотека тэрилиннэ, — диэн иһитиннэрдэ «Сайдам» сынньалаҥ киин салайааччыта Марианна Ильинова.