Эһиилги кыстыкка Эдьигээн оройуонун үрдүнэн икки эрэ ыал хороҕор муостааҕы тутарга былааннаналлар. Ол – Эдьигээҥҥэ Соломонова Виктория Петровна уонна Бэстээххэ – Николаева Вера Дмитриевна тус бэйэлэрин көмөлтө хаһаайыстыбалара.
Стрекаловка үрэх үрдүгэр сөбүлээн мэччийэр сүөһүлэри Эдьигээн уулуссаларыгар түбэһэ көрдөххө, сэдэх хартыына курдук, сэҥээриллэр көстүү буолла. Ынахтарын кыстатар отторун булунаары от ыйын 20 күнүттэн хаһаайыстыба хаһаайына Иван Соломонов Уолбаҕа оттуур ходуһаларыгар таҕыста. Биригээдэҕэ билиҥҥитэ түөрт отчут баар Иван Михайлович бэйэтэ, Намтан ыалдьыттыы кэлбит табаарыһа , Семен Кириллов уонна Дмитрий Соловьев. Бу өрөбүл күннэргэ сыллата буоларын курдук Яна Андреева, Саргылана Соловьева, Анна Соломонова, Лена Васильева сиэннэрин кытта тахсаннар, отчуттарга көмөлөстүлэр. Онон ходуһаҕа бастакы бугуллар чөкөтүлүннүлэр.
Үчүгэйэ диэн, быйылгы курдук уматык кырыымчыктаммыт уонна хааччахтаммыт кэмигэр, Эдьигээн нэһилиэгин дьаһалтата “ Тыа хаһаайыстыбатын өйөөһүн” диэн программаҕа олоҕуран отчуттарга транспорт сырыытыгар уматык сөптөөх кээмэйин сыанатын толуйарга итиэннэУолбаҕа тиэрдэр суолу , икки муостаны бэйэлэрэ көрөн-истэн өрөмүөннүүллэригэр 45 тыһ. солк. көрбүт.