Атырдьах ыйын 19 күнүгэр Эдьигээн оройуонун Бэстээх нэһилиэгэ тэриллибитэ 75 сылын бэлиэтиир үбүлүөйдээх тэрээһиннэр ыытылыннылар. Үөрүүлээх быһыыга-майгыга ыраахтан-чугастан ыҥырыылаах ыалдьыттар, Бэстээхтэн төрүттээхтэр, олорон, үлэлээн ааспыт дьон-сэргэ, олохтоохтор тоҕуоруһа муһуннулар. Бэстээх бөһүөлэгэ Өлүөнэ өрүс бар дьоҥҥо биллэринэн аатырбыт түөрдүөн түөрт арыыларын Бэстээх диэн үрэх хаҥас биэрэгэр 1948 сылтан тэриллибитэ.
Бу күннэргэ хотуттан күүстээх тыал түһэн өрүһүнэн айанныыр сэрэхт ээх буолан, хомойуох иһин, Эдьигээнтэн, Кыстатыамтан, Баахынайтан тиийиэхтээх ыалдьыттар үбүлүөйдээх тэрээһиннэргэ кыайан кэлбэтилэр.
Үбүлүөйдээх тэрээһин арыллыыта ыалдьыттары көрсүү уонна алгыс этии, аал уоту аһатыы сиэриттэн-туомуттан саҕаланна. Бу эппиэтинэстээх соругу национальнай култуура үөрэхтээҕэ, Бэстээх нэһилиэгин оскуола-уһуйаанын үлэһитэ Варвара Старостина ыытта. Салгыы Эдьигээн оройуонун баһылыга В.Н.Сорокин эҕэрдэ суругун уонна 75 тыһ.солк. сумалаах сертификатын дьаһалтаҕа тиэртилэр. Эдьигээн нэһилиэгин баһылыга С.С.Портнягин видеонан эҕэрдэтин иһитиннэрдэ уонна 50 тыһ.солк. сумалаах сертификаты бэлэх анаата. Бу киирбит үптэр Бэстээх нэһилиэгин тас көстүүтүн тупсарыыга ананыахтара диэн нэһилиэк баһылыга иһитиннэрдэ. Санатар буоллахха, Бэстээх бөһүөлэгэ тэриллиэҕиттэн Степан Портнягин эһэтэ Степан Иванович Портнягин салайааччылаах 15 киһилээх биригээдэ түҥ ойууру солоон кыыл иитэр ферманы тутан саҕалаабыттара. Онтон ыла Бэстээххэ тыа хаһаайыстыбата сайдан, үлэ күөстүү оргуйан барбыта.
Үөрүүлээх быһыыга-майгыга өр кэмҥэ нэһилиэккэ салайар үлэҕэ үлэлээбит Г.Ф.Мальцев Бэстээх нэһилиэгин дьаһалтатын аатыттан махтал суругу тутта. Салгыы нэһилиэк баһылыга П.О.Афанасьев Бэстээх нэһилиэгэр олорор ытык-мааны ыалларга Зинаида Павловна уонна Афанасий Михайлович Николаевтарга, Вера Дмитриевна уонна Геннадий Михайлович Николаевтарга, Наталья Дмитриевна уонна Василий Иннокентьевич Афанасьевтарга, Айталина Романовна уонна Геннадий Федородич Мальцевтарга, Мария Харлампьевна уонна Михаил Михайлович Соломоновтарга, Наталья Ивановна уонна Владимир Викторович Холмогоровтарга, Галина Леонидовна уонна Феликс Иванович Корякиннарга, Екатерина Дмитриевна уонна Евгений Анатольевич Бадаевтарга, Ирина Ивановна уонна Михаил Николаевич Спиридоновтарга, Светлана Гаврильевна уонна Николай Николаевич Ивановтарга, Айталина Павловна уонна Евгений Федорович Андреевтарга, Дария Ивановна уонна Федор Гаврильевич Матвеевтарга, Ирина Иннокентьевна уонна Владимир Дмитриевич Чемпоровтарга махтал суруктары уонна өйдөбүнньүк бэлэхтэри туттартаата.
Бэстээх нэһилиэгин тыатын хаһаайыстыбатын сайдыытыгар кылаатын киллэрсибит, олоҥхоһут, эмчит быһыытынан биир дойдулаахтарыгар биллибит-көстүбүт ытык кырдьаҕас Дмитрий Саввич Саввинов аатынан, кини сыдьааннара 10 тыһ. солк. сумалаах истипиэндийэни уонна чороону бары аймахтар ааттарыттан Дьокуускайтан кэлэ сылдьар Дмитрий Афанасьевич Саввинов уонна кини уола Айал Саввинов үөрүүлээх быһыыга-майгыга үчүгэй үөрэҕин, нэһилиэк уонна оскуола олоҕор көхтөөх кыттыытын иһин Бэстээх оскуолатын үөрэнээччитигэр Григорий Андросовка туттардылар.
Ол кэннэ олохтоохтор өрө күүрүүлээхтик Бэстээх нэһилиэгин өрөгөй ырыатын толордулар, «Сарыал» сынньалаҥ киин үлэһиттэрэ тэрийиилэринэн олохтоох самодеятельность кыттыылаах «Үбүлүөйгүнэн, төрөөбүт Бэстээхпит!» эҕэрдэ кэнсиэрэ туруорулунна. Салгыы Бэстээх туһунан видеороликтары оҥоруу күрэҕэр кыттыбыт дьон үлэлэрин көрүү буолла. Нэһилиэк дьаһалтата бу күрэххэ кыттыбыт дьоҥҥо харчынан бириис туттарда. Онтон быйыл 75 сааһын томточчу туолбут нэһилиэги кытта биир саастаах олохтоох ытык кырдьаҕаска Афанасьев Василий Иннокентьевичка олохтоох дьаһалта телевизор бэлэх уунна.
Элбэх кыттааччыны, ыалдьааччыны түмпүт сүрүн тэрээһининэн “Тоҕус моһол” күрэх буолла. Манна үстүү кыттааччылаах 4 хамаанда күөн көрүстүлэр. Күрэххэ ыччаттар 9 түһүмэҕи аастылар. Ол курдук, хамаандалар 30 киилэ ыйааһыннаах сүгэһэри сүгэн, көлүөһэни үтэн сүүрүүгэ күрэстэстилэр. Салгыы күрэхтэһээччилэр оҥочоҕо олорон моһоллору аастылар, ол кэннэ ласты кэтэн баран сүүрдүлэр, ох саанан ытыыга күрэхтэстилэр, дулҕалар үрдүлэринэн ойуоккалаатылар, быанан тутуһан сыыры дабайдылар, ыйанан турар быанан тутустан аппаны туораатылар, 25 киилэ ыйааһыннаах куулу көтөҕөн сыыры таҥнары түстүлэр, үктэллээх муостаны туорааһын тыҥааһыннаах күрэхтэргэ кииристилэр. Күрэхтэһээччилэр бары кыахтарын түмэн, ыалдьааччылар күүстээх өйөбүллэринэн бэрт сэргэх, сонун күрэхтэһии ааста.
Күрэхтэһии түмүгүнэн бары түһүмэхтэргэ үрдүк көрдөрүүлэнэн Ростислав Кангалассов хамандыырдах хамаанда кыайыы өрөгөйүн билэн 30 тыһ.солк. сумалаах сертификатынан наҕараадаланна. Валерия Митясова салайааччылаах хамаанда иккис миэстэҕэ тахсан 15 тыһ.солк. сумалаах сертификаты ылла. Онтон үһүс миэстэлээх Вячеслав Матвеев хамандыырдаах хамаанда, төрдүс миэстэлээх Иван Митясов хамандыырдаах хамаанда 5 тыһ.солк. сумалаах сертификаттарга тигистилэр. Бу күрэххэ бириистэргэ анаан территориянан уопсастыбаннай салайыныы «Дьулуур» ыччат тэриллиитэ, салайааччы Мария Корякина 25 тыһ.солк. көмөнү оҥордо. Ол курдук, бу тэриллии спортивнай күрэхтэргэ көхтөөх кыттыыларын иһин махтал суруктары уонна өйдөбүнньүк бэлэхтэри Иван Митясовка, Ростислав Кангаласовка, Николай Чемпиҥҥа, Василий Чемпиҥҥа, Дайаана Корякинаҕа, Валерий Митясовка туттарда. Онтон Бэстээх оскуола-уһуйаанын салалтата бу күрэх саамай эдэр кыттааччытыгар 5 тыһ.солк. сумалаах сертификаты 8 кылаас үөрэнээччитигэр Даяна Корякинаҕа туттарда.
Үбүлүөйгэ Эдьигээнтэн анаан-минээн Бэстээхтэн төрүттээх Мария Егоровна Иванова, Наталья Дмитриевна Никифорова, Светлана Леонидовна Шадрина, Татьяна Ивановна Алексеева уонна Горнай улууһуттан Георгий Иванович Слепцов ыалдьыттыы тиийбиттэр. Ыраахтан кэлбит ыалдьыттарга аҕа баһылык Петр Олегович Афанасьев махтал сурук уонна өйдөбүнньүк бэлэхтэри туттарда. Ону сэргэ Бэстээх нэһилиэгэр олорон ааспыт Варвара Саввична уонна Прокопий Дмитриевич Митясовтар сыдьааннара ыраахтан-чугастан кэлэн ыалдьыттаан, күрэхтэһиилэргэ, тэрээһиннэргэ көхтөөх кыттыыны ыллылар.
-Атырдьах ыйын 18 күнүгэр Бэстээх нэһилиэгэ тэриллибитэ 75 сылыгар аналлаах тэрээһиннэр чэрчилэринэн, култуура эйгэтин үлэһиттэрэ ыччакка анаан ырыа аргыстаах доҕордоһуу киэһэтин тэрийдибит. Саха эстрадатын эдэр сулуһа Юлиан Семенов уонна «Саха» НКИХ «Саҥа күн» биэрии ыытааччыта, ырыаһыт Роман Алексеев-Амор Бэстээх үбүлүөйүгэр аналлаах култуурунай тэрээһиннэргэ кыттыыны ыллылар. Бу күн ыччакка анаан кутаа уоту тула олорон гитара доҕуһуоллаах ырыа эйгэтин тэрийдибит. 90-с сыллардаахха аата ааттаммыт ырыаһыт Никифор Семенов уола Юлиан Семенов уонна «Саха» НКИХ биэрии ыытааччыта, ырыаһыт Амор доҕордоһуу киэһэтин тэрийэргэ күүс-көмө буоллулар. Бу киэһэ олорон «Таайыллыбат таабырыҥҥын-Бэстээх кыыһа эн нарыҥҥын» диэн нарын-намчы биир кэрэ ырыа айыллан таҕыста. Бу ырыа Бэстээх үбүлүөйүгэр биир истиҥ бэлэҕинэн буолла, — диэн култуура уонна туризмы сайыннарыы отделын салайааччыта Аполлон Степанов кэпсээтэ.
Бэстээх нэһилиэгин дьаһалтата үбүлүөйгэ кэлбит дьоҥҥо-сэргэҕэ бырааһынньыктааҕы фуршет тэрийдэ. Манна нэһилиэк депутата Геннадий Мальцев балыктаабыт Бэстээх эмис собото, кымыс, о.д.а мааны астар сандалы устун тардыллыбыттар. Бу күн нэһилиэк дьаһалтата элбэх оҕолоох Митясов В.В. уонна Самсонова К.А. дьиэ кэргэттэригэр бородуукта хомуурун биэрдэ. Олохтоох иистэнньэҥ Анна Григорьевна Осипова үбүлүөйгэ анаан 50 сахалыы олбоҕо тигэн дьон биһирэбилин уонна махталын ылла.
-Нэһилиэк үбүлүөйүн тэрийии элбэх сыраны-сылбаны, эппиэтинэһи эрэйэр. Онон биһиги олохтоохтор уонна дьаһалта аатыттан улуус дьаһалтатын култуура уонна туризмы сайыннарыы отделын салайааччытыгар А.Д.Степановка, «Сарыал» сынньалаҥ киинигэр, Бэстээх оскуола-уһуйааныгар, олохтоох авторга В.Н. Аполлоноваҕа, минньигэс астарынан күндүлээбит А.В.Чемпинаҕа, М.П. Гаврильеваҕа, С.С.Далакыроваҕа, А.Г.Осиповаҕа, В.М.Старостинаҕа, урбаанньыт Е.Ф.Андреевка, спортивнай күрэхтэргэ судьуйалаабыт хамыһыйа салайааччыларыгар А.Н. Эверстоваҕа уонна Г.Ф. Корякиҥҥа, кинилэргэ көмө буолбут Коля Чемпиҥҥа, Юра Алексеевка, Бэстээх нэһилиэгин баһылыгын солбуйааччыга А.П.Ивановаҕа, Алейсей Филипповка, мотуорунан илдьибит-аҕалбыт С.И.Егоровка, ону сэргэ бары ыалдьыттарбытыгар, кыттааччыларга барҕа махталбытын тиэрдэбит. Барыгытыгар чөл туругу, этэҥҥэ буолууну баҕарабыт, — диэн иһитиннэрдэ Бэстээх нэһилиэгин баһылыга Петр Афанасьев.
Үбүлүөйдээх тэрээһин чэрчитинэн мустубут дьон ортотугар “Сарыал” сынньалаҥ киинин үлэһиттэрэ лотерея ыыттылар, манна сүрүн бирииһинэн 10 тыһ.солк. оонньонно. Онуоха бу бирииһи бааттаах буолан, сэттэ оҕолоох улахан дьиэ кэргэн аҕа баһылыга Валерий Митясов сүүйэн өрөгөйө үрдээтэ.
Үбүлүөйдээх дьаһал саха эстрадатын сулустара Юлиан Семенов уонна Амор эҕэрдэ кэнсиэртэринэн, үҥкүү киэһэтинэн түмүктэннэ.