Тохсунньу 9 күнүгэр Эдьигээн оройуонун дьаһалтатын сыллааҕы үлэтин отчуота тэйиччи сытар Бэстээх уонна Баахынай нэһилиэктэриттэн саҕаланна. Оройуон баһылыга Василий Сорокин, дьаһалта эппиэттээх үлэһиттэрэ, управлениелар, тэрилтэлэр салайааччылара ааспыт сыллааҕы үлэлэрин отчуоттуур сыаллаах олохтоохтору кытта көрүстүлэр. Сарсыарда 6 чаастан массыынанан айаннаан эбиэт диэки Бэстээх нэһилиэгэр тиийдилэр. Мунньах оскуола спортивнай саалатыгар буолла.
Отчуоттуур мунньахха экономическай сайдыы управлениетын кылаабынай специалиһа Ирина Жолудева 2023 сыл түмүктэрин сырдатта. Оройуон баһылыгын социальнай боппуруостарга солбуйааччы Софья Ефремова, оройуоннааҕы үөрэх управлениетын салайааччыта Юрий Шамаев, тутуу уонна архитектура отделын салайааччыта Лариса Шадрина, оройуоннааҕы киин балыыһа кылаабынай бырааһа Владимир Татаринов, тыа хаһаайыстыбатын управлениетын начальнига Сергей Корякин, култуура уонна туризмы сайыннарыы отделын салайааччыта Аполлон Степанов, нэһилиэнньэ социальнай харалтатын управлениетын салайааччыта Яна Андреева уонна Эдьигээннээҕи Ис дьыала отделын үлэһитэ Денис Уваров сыллааҕы үлэлэрин отчуотун олохтоохторго билиһиннэрдилэр.
Салгыы оройуон баһылыга Василий Сорокин ааспыт сыл түмүктэрин сырдатта, үүммүт сыл былааннарын иһитиннэрдэ. Ол курдук, 2023 сыл атырдьах ыйыгар Бэстээх нэһилиэгэ тэриллибитэ 75 сыллаах үбүлүөйүн олохтоохтор, ыраахтан-чугастан кэлбит ыалдьыттар үөрүүлээхтик бэлиэтээбиттэрэ. «Доруобуйа харыстабыла» национальнай бырайыагынан үбүлэнэн тутуллубут фельдшерскэй-акушерскай пуун үлэҕэ киирбитэ. «Сарыал» култуурунай киин дьиэтэ хаарбах туруктанан сабылларга күһэллэн, ааспыт сайын балыыһа эргэ дьиэтигэр көһөн тэрээһиннэр онно ыытыллаллар. Нэһилиэккэ биир киин хочуолунай баар, онно тэрилтэлэр уонна аҕыйах уопсай дьиэ холбонон олороллор, онтон чааһынай дьиэлээх дьон оһох отторго күһэллэллэр. Ааспыт сылтан «Альтернатива-ЖКХ» ХЭТ хочуолунай тутуутун саҕалаан быйыл күһүн үлэҕэ киллэрэр былааннаах. Онно анаан нэһилиэк дьаһалтата олохтоох көҕүлээһиннэр программанан бырайыактары олоххо киллэриигэ үп ылан, итиини киллэрэр ситими чааһынай дьиэлэргэ тиэрдэргэ турбалары атыыласпыта. Өрөспүүбүлүкэтээҕи «Үтүө дьыалалар» хамсааһыҥҥа киирсэн Бэстээххэ элбэх хайысхалаах киин тутуллуута 2025 сылга былааҥҥа турарын оройуон баһылыга иһитиннэрдэ. Улуус дьаһалтата 1 мөл. 500 тыһ. солк. сумалаах бырайыактыыр-смета докумуонун түмүктээн эрэр. Оройуон дьаһалтата аһаҕас халлаан анныгар, сибиэһэй салгыҥҥа дьарыктанарга анаммыт нэһилиэк спортивнай былаһааккатыгар саҥа бүрүөһүнү биэрбит. Нэһилиэк баһылыгар Петр Афанасьевка улуус баһылыга хороҕор муостааҕы тутар нэһилиэк олохтооҕор Геннадий Николаевка хотон туттарыгар көмө оҥороругар сорудах биэрдэ. Геннадий Михайлович үйэтин тухары сүөһүнү, сылгыны тутан биир дойдулаахтарын бэйэ бородууксуйатынан кыаҕа баарынан хааччыйан кэллэ. Билигин кини 5 сүөһүлээх, 2 сылгылаах, инникитин «Социальнай хантыраак» судаарыстыбаннай программаҕа киирсэн хаһаайыстыбатын кэҥэттэр былааннааҕын эттэ. Оройуон баһылыга улуус кииниттэн ураты баар нэһилиэктэргэ спорду сайыннарыы үлэтэ күүскэ ыытыллыахтааҕын ыйда.
Мунньах кэнниттэн 2024 сыл Арассыыйаҕа Дьиэ кэргэн, Саха сиригэр Оҕо саас, Эдьигээн оройуонугар Р.М.Дмитриев 75 сылынан биллэриллибиттэрин туһунан баһылыгы социальнай боппуруостарга солбуйааччы Софья Ефремова бэлиэтээтэ. Ол кэннэ «Таптал уонна бэриниилээх буолуу иһин» мэтээлэ, СӨ Ил Дарханын Грамотата, СӨ Үлэ министерствотыттан эҕэрдэ суруга Бэстээх нэһилиэгин сис ыалыгар Зинаида Павловна уонна Афанасий Михайлович Николаевтарга ананнылар. 2024 сылга Арассыыйаҕа биллэриллибит Дьиэ кэргэн сылынан СӨ (Ил Түмэн) Судаарыстыбаннай мунньаҕын депутаттарын Елена Голомарева уонна Александр Сусоев ааттарыттан Бэстээх нэһилиэгэр олорор элбэх оҕолоох Любовь Юрьевна уонна Валерий Викторович Митясовтар оҕолоругар минньигэс бэлэхтэр туттарылыннылар. Ааспыт 2023 сылга Саха сиригэр Ил Дархан уонна норуот дьокутааттарын быыбарын Бэстээххэ ыытарга уонна тэрийсэргэ көхтөөх кыттыыны ылбыттарын иһин СӨ дьаһалтатыттан уонна Бырабыыталыстыбатыттан махтал суруктары Мальцев Г.Ф. уонна Чемпина А.В. туттулар.
Салгыы оробуочай бөлөх Баахынай нэһилиэгэр тиийэн үлэлээтэ. Отчуоттуур мунньах эмиэ Бэстээххэ ыытыллыбыт бэрээдэгинэн барда. Нэһилиэккэ 40 уонна 25 миэстэлээх оскуола-уһуйаан тутуутун бырайыактыыр-смета докумуона түмүктэнэр кэрдиискэ сылдьарын улуус баһылыга бэлиэтээтэ. Ол кэннэ «Комплексное развитие сельских территорий» федеральнай программаҕа сайаапка биэрэн конкурса кыттыыны ылыы үлэтэ ыытыллыахтаах. Былырыын «Сайдам» сынньалаҥ киин дьиэтигэр федеральнай программанан хапытаалынай өрөмүөн оҥоһуллубута. Быйыл аны олохтоох көҕүлээһиннэр программанан кулууп таһынааҕы өттө өрөмүөннэниэхтээх. Баахынай баһылыгар Николай Антоновка улуус баһылыга бэйэ бородууксуйатын оҥорон таһаарыыга кэккэ хайысхалары сайыннарыыга үлэ барыахтаах диэн сорук туруорда. Ордук олохтоохтор хортуоппуйу, оҕуруот аһын арааһын өлгөмнүк үүннэрэн бэйэ бородууксуйатын дэлэтиэххэ наадатын ыйда. Онуоха нэһилиэк баһылыга урукку саһыл тутар ферматын сирин ылсан үлэлиир, баҕалаах киһиэхэ бааһына тэринэригэр анаан биэрэр былааннаахтарын эттэ. Оройуон баһылыга улуус киинигэр эрэ буолбакка бары нэһилиэктэргэ маассабай спордунан дьарыктаныыны көҕүлээһин наадатын эттэ. Ол туһугар нэһилиэктэргэ спорт фестивалларын, күрэхтэһиилэри бу сылга ыытыаххайыҥ диэн баһылыктары, ыччат политикатын уонна спорт отделын үлэһиттэрин ыҥырда.
Мунньах түмүгэр 2024 сылга Арассыыйаҕа биллэриллибит Дьиэ кэргэн сылынан СӨ (Ил Түмэн) Судаарыстыбаннай мунньаҕын депутаттарын Елена Голомарева уонна Александр Сусоев ааттарыттан Баахынай нэһилиэгэр олорор элбэх оҕолоох Анна Васильевна Николаева оҕолоро минньигэс бэлэхтэри туттулар. Баахынай нэһилиэгин ытык кырдьаҕаһыгар А.М. Варвариковаҕа “Почетный старейшина РС(Я)” түөскэ кэтиллэр бэлиэ туттарылынна. СӨ «Олох-дьаһах, коммунальнай хаһаайыстыба» тэрилтэтин 25 сыллаах үбүлүөйдээх түөскэ кэтиллэр бэлиэтин хочуолунай хачыгаара Иван Антонов, Бочуотунай грамотатын Александр Шемяков үөрүүлээх быһыыга-майгыга ыллылар.
Баахынай, Бэстээх нэһилиэктэрин олохтоохторо оройуон дьаһалтатын отчуотун биһирээтилэр.