Айылҕа силигилии ситэн турар кэмигэр- бэс ыйын 21 күнүгэр Бэстээххэ ыһыах ыстылар. “Сайдам” сынньалаҥ киинэ тэрийиитинэн киэҥ программалаах бырааһынньык ыытылынна. Үгэс быһыытынан ыһыах арыллыытын сиэрэ-туома дьону түмэ тарта.
Оҕолорго аналлаах уолаттар ортолоругар – “Бэстээх боотура”, кыргыттарга “Кыыс Ньургун” күрэх буолла. Манна спорт национальнай көрүҥнэригэр: атах оонньууларыгар, сүүрүүгэ, хапсаҕайга күрэхтэстилэр. Түмүккэ Дархан Ильинов ”Бэстээх Боотура”, Дайаана Корякина -“Кыыс Ньургун” ааттарыгар чиэстээхтик тигистилэр. Сахалыы ох саанан ытыыга дьахталлар илин-кэлин түһүстүлэр. Инники күөҥҥэ Мария Корякина тахсан “Бэргэн ытааччы”аатыгар тигистэ. «Аймахтар бары бииргэ” диэн ааттаммыт дьиэ кэргэннэр ортолоругар күрэхтэһии интэриэһи тарта. Манна Митясовтар-Ильиновтар, Митясовтар-Андросовтар, Афанасьевтар-Гаврильевтар уонна Корякиннар дьиэ кэргэнинэн кытыннылар.Бары бииргэ мас мастаан кыстааһыҥҥа, уу таһыытыгар, ийэлэр-собо ыраастааһыныгар, үөстээһинигэр, уолаттар оҕуруот аһыттан салат оҥоруутугар холоннулар. Түмүгэр Корякиннар дьиэ кэргэн кыайыылааҕынан таҕыстылар.
