Ыам ыйын 25 күнүгэр Эдьигээн нэһилиэгэр, үтүө үгэскэ кубулуйбут, эбэҥки норуотун бырааһынньыга «Бакалдын» буолан ааста. Бырааһынньыкка кэлбит биир дойдулаахтарын уонна ыалдьыттары оройуон баһылыгын эбээһинэһин толорооччу Дмитрий Татаринов уонна «Дюмия» оройуоннааҕы этнокултуурунай киин салайааччыта Аполлон Степанов ытык таба макетын нөҥүө илии тутуһан көрүстүлэр. Салгыы кэлбит дьон «Чычыпкаан», «Еллувка», «Сэвэк Мо», «Секалавун», «Һулганни» эбэҥки норуотун төрүт сиэрин-туомун аастылар. «Имты» диэн Аал уот иччитин ааттаан-суоллаан аһатыы сиэрин-туомун СӨ култууратын туйгуна Туйаара Егорова ыытта.
Тэрээһин үөрүүлээх арыллыыта Аҕыйах ахсааннаах норуоттар ассоциацияларын былааҕын көтөҕүүттэн саҕаланна. Бакалдыын бырааһынньыгынан бар дьоннорун оройуон баһылыгын эбээһинэһин толорооччу Дмитрий Татаринов, Аҕыйах ахсааннаах норуоттар ассоциацияларын Эдьигээннээҕи салаатын бэрэссэдээтэлэ Лидия Атласова, педагогическай үлэ бэтэрээнэ Мария Николаевна Иванова эҕэрдэлээтилэр. Бу күн СӨ олохтоох бэйэни салайыныы боппуруостарын департаменын, СӨ Ил Дарханын дьаһалтатын уонна Бырабыыталыстыбатын махталын Эдьигээн нэһилиэгин дьаһалтатын специалистара Николай Федотов, Меркурий Сабычиков, Лииндэ нэһилиэгин баһылыгын солбуйааччы Люция Алексеева туттулар.
«Икэчик» эҕэрдэ кэнсиэригэр “Эдиген Һокто” фольклорнай ансаамбыл, “Северное сияние” оҕо образцовай ансаамбыл, “Юктэ”, “Аникта” үҥкүү ансаамбыллара, Мария Кузнецова, Алина Егорова (тугутчаан), Тамара Винокурова кыттыыны ыллылар.
Бу күн Эдьигээн нэһилиэгин дьаһалтата биир дойдулаахтарын уонна ыалдьыттары хаас миининэн уонна алаадьынан күндүлээтэ. Бырааһынньык сүрүн тэрээһининэн, үтүө үгэскэ кубулуйбут, тэрилтэлэр, общественнай түмсүүлэр, аймах-билэ дьон икки ардыларыгар ыытыллар «Дюмия» күрэҕэ буолла.
13-15 саастаах оҕолорго аналлаах «Аяврина» («Кэрэ кыыс») уонна «Аилун» («Хорсун булчут») диэн күрэхтэр буоллулар. «Аяврина» күрэххэ үс кыыс бэйэни билиһиннэрии, талааны көрдөрүү, оҕуруолааһын, эбэҥки норуотун төрүт аһын астаан аҕалан көмүскээһин түһүмэхтэригэр уонна «Хотугу ньургуһун» авангард муодатыгар кииристилэр. Күрэх түмүгүнэн Эдьигээн орто оскуолатын 9 кылааһын үөрэнээччитэ Алексина Васильева «Аяврина» күрэх кыайыылааҕынан таҕыста, иккис миэстэни Эдьигээн орто оскуолатын 8 кылааһын үөрэнээччитэ Вероника Христофорова, үһүс миэстэни Эдьигээн орто оскуолатын 6 кылааһын үөрэнээччитэ Виктория Христофорова ыллылар. «Аилун» күрэххэ Эдьигээн орто оскуолатын 8 кылааһын үөрэнээччилэрэ Максим Данилов уонна Александр Петров күөн көрүстүлэр. Уолаттар бэйэлэрин билиһиннэрдилэр, талааннарын арыйдылар, кыахтарын көрдөрдүлэр, эбэҥки норуотун төрүт аһын астаан аҕалан көмүскээтилэр уонна «Хотугу ньургуһун» авангард муодатыгар кииристилэр. Бу күрэххэ кыайыылааҕынан Александр Петров ааттанна, иккис миэстэни Максим Данилов ылла. Күрэх кыайыылаахтара харчынан бириистэри уонна грамоталары бэлэх туттулар.
Оҕолорго аналлаах «Икэн-ми» эбэҥкилии хоһоон уонна ырыа толоруутун күрэҕэ ыытылынна. Манна кыайыылааҕынан Айдар Бабанов буолла, иккис миэстэни Арина Николаева уонна Аэлина Бабанова, үһүс миэстэни Алия Иванова уонна Спартак Софронов ыллылар. Ырыа күрэҕэр Арина Николаева тэҥнээхтэрин булбата, иккис миэстэҕэ «Орончикан» уһуйаан «Иманнакан» бөлөҕүн иитиллээччилэрэ таҕыстылар.
Бырааһынньык кэмигэр оҕолорго «Нория», «Олломи», «Кубкан», «Тувсавки» төрүт эбэҥки оонньуулара ыытылыннылар. Онтон улахан дьон ортолоругар маамыкта быраҕыыта, ох саанан ытыы уонна «Ловля хариуса» күрэхтэр буоллулар. Кэрэ аҥардар ортолоругар маамыкта быраҕыытыгар Майя Сафиулина кыайыылааҕынан таҕыста, иккис миэстэ – Алина Ким, үһүс миэстэ – Лена Львова. Эр дьоҥҥо: I миэстэ – Александр Рассадин, II миэстэ – Георгий Винокуров, III миэстэ – Байдар Борисов. Ох саанан ытыыга эр дьоҥҥо: I миэстэ – Стив Попов, II миэстэ – Алексей Шадрин, III миэстэ – Михаил Анастахов. Кэрэ аҥардарга: I миэстэ – Таисия Константинова, II миэстэ – Гульнара Портнягина, III миэстэ – Надежда Соломонова. Уолаттарга: I миэстэ – Эрэл Львов, II миэстэ – Саша Петров, III миэстэ – Алексей Лапин. Кыргыттарга: I миэстэ – Алексина Саввина, II миэстэ – Алекса Васильева, III миэстэ – Аина Харитонова. «Ловля хариуса» күрэххэ эр дьоҥҥо Александр Рассадин кыайыылааҕынан буолла, II миэстэ – Илья Егоров, III миэстэ – Захар Новиков, онтон уолаттарга Алкивиад Сорокин бастаата, II миэстэ – Иван Шемяков, III миэстэ – Арылхан Попов.
Эбэҥки норуотун ырыаларын таһаарааччы күрэҕэр оҕолор уонна ыччаттар икки ардыларыгар Айгуль Винокурова кыайыылааҕынан ааттанна, II миэстэ – Алексина Васильева, III миэстэ – Ксения Григорьева буоллулар. Улахан дьоҥҥо Туяна Иванова тэҥнээхтэрин булбата, онтон Людмила Степанова, Мария Федорова, Майя Попова, Пелагея Львова, Мария Николаева «Бастыҥ ырыа таһаарааччы» анал ааты ыллылар.