Ыам ыйын 18 күнүгэр Саха сиригэр хоһооҥҥо хоһуллубут, ырыаҕа ылламмыт ньургуһун сибэкки күнүн бэлиэтиибит. Эдьигээн оройуонугар саһархай уонна хара саарыл өҥнөөх ньургуһуннар үүнэллэр. Бу күннэргэ олохтоохтор ньургуһуннаах сирдэргэ тиийэн, кэрэ көстүүгэ хаартыскаҕа түспүттэр.
Бэстээх, Баахынай уонна Кыстатыам нэһилиэктэригэр саһархай, онтон Эдьигээҥҥэ саһархай уонна хара саарыл өҥнөөх ньургуһуннар үүнэллэр.
Эдьигээҥҥэ ньургуһун өлгөмнүк порт хайатыгар тахсар эбит. Ыам ыйын 11 күнүгэр Стрекаловка үрэх мууһа барбыта. Бу күннэргэ Өлүөнэ өрүс эстэрэ күүтүллэр. Онон ньургуһуннары көрөөрү, хаартыскаҕа түһээри Эдьигээн олохтоохторо «Севербот» көлөнөн Стрекаловка үрэҕи туорууллар. Эдьигээн нэһилиэгин порт микрорайонугар олорор Людмила Георгиевна Алексеева тэлгэһэтигэр ньургуһуннар үүнэллэр.
— 6 сыллааҕыта тиэргэммэр ньургуһун луковицаларын олордубутум. Онтон ыла саас аайы тэлгэһэбэр ньургуһуннар үүнэллэр. Ону сэргэ, 12 сыллааҕыта сардааналары олордон саҕалаабытым, онтуларым сылын аайы элбээн сайынын тэлгэһэбин киэргэтэллэр. Дьүөгэлэрим, о5олорум, сиэннэрим, аймах-билэ дьонум кэлэн хаартыскаҕа түһэллэр, — диэн кэпсээтэ Людмила Алексеева.