Алтынньы 29 күнүгэр, киэһэ 7 чаастан, Кыстатыам нэһилиэгэр Хомсомуол бэтэрээннэрэ уонна эдэр ыччат көрсүһүүлэрэ бэрт сэргэхтик, сонуннук буолан ааста.
Тэрээһин, хомсомуоллар строевой хаамыыларынан саҕаланна. Комсомольскай знамяны нэһилиэккэ хас да көлүөнэни үөрэппит, педагогическай үлэ бэтэрээнэ Татьяна Николаевна Бурцева киллэрдэ. Тэрээһин сыалын-соругун билиһиннэрэн баран, киирии тыл этилиннэ.
Салгыы, библиотекарь Анна Николаевна ыччаттарга Хомсомуол Саха сиригэр, Эдьигээҥҥэ хайдах төрүттэммитин быыстапка нөҥүө көрдөрөн туран сырдатта. Ити сырдатыыны, өссө чиҥэтэн Кыстатыам комсомолецтарыгар, секретарьдарыгар тохтоон, түмэл матырыйаалын туһанан, Татьяна Николаевна кэпсээтэ.
Ыччат кэрэхсэбилин тардан, Октябрина Николаевна ол саҕанааҕы ыччаттар Хайыһар десаныгар сылдьалларын, учууталлар отпуска кэмигэр таба ыстаадатыгар тахсан үлэлээбиттэрин кэпсээн сырдатта.
Дьэ ол эрэ кэннэ сыыйа Барылы дьүүллэһиэх иннинэ олохтоох дьаһалта специалиһа Нария Феликсовна билиҥҥи ыччат статистикатын билиһиннэрдэ. Бары сырдатыы, араас ахтыы кэнниттэн көрсүһүү сүрүн тематыгар киирдилэр.
Кыстатыам нэһилиэгин убаастанар, өр сылларга сельсовет бэрэссэдээтэлинэн үлэлээбит, педагогическай үлэ бэтэрээнэ Мария Архиповна эдэр ыалларга туһаайан оҥорбут «Тиэргэн — ыал Ытык уйата» Барылын дьүүллэһии буолла. Ити курдук, тэрээһин кэмигэр тыл да этээччи элбэх, Барылга эбиилэри да киллэриигэ этилиннилэр.
2026 сыл алтынньы 29 күнүгэр Ыччат Бүтүн Союзтааҕы Ленинскэй Комсомольскай союһа тэриллибит күнүгэр анаан Кыстатыам эдэр ыччата, Хомсомуол бэтэрээннэрин түмсүүлэрин кытта көрсүһүүлэрин түмүгэр «Тиэргэн — ыал ытык уйата» Барылы дьүүллэһэн баран маннык быһаардылар:
1) Хас биирдии дьиэ-уот нэһилиэк киэн туттуута буоларын туһугар, бэйэбит тиэргэммитин ыраастаан, бэрээдэктээн, хаарбах тутуулары көтүрэн тиэргэни тупсарыы.
2) Төрүттэрбит олорон ааспыт олохторун көрдөрөр туһуттан Холомо, Ураһа эбэтэр Балаҕан туттан сайынҥы кэмҥэ туһанарга.
3) Оҕуруот аһын үүннэрэн дьиэ кэргэҥҥэ эбии дохуот киллэринэргэ. 2027 сыл Хортуоска о. д. а. оҕуруот аһын олордунан күһүн балаҕан ыйыгар түмүгүн быһааран «Күһүҥҥү киһи күлбүтүнэн» диэн тиэмэлээх биэчэри тэрийии. Кыайыылаахтары быһаарыы, наҕараадалааһын.
4) Тиэргэннэрбит уонна нэһилиэкпит уулуссаларын араас дьэрэкээн сибэккилэринэн уонна араас от-мас көрүҥнэрин олордон тупсарарга.
5) Тиэргэҥҥэ эбии дөлүһүөн, хаптаҕас, уохта, моонньоҕон о. д. а. араас сир астарынан олордон, ыалдьыттары уонна бэйэбитин үөрдэргэ.
6) Сыллата бөх тоҕор сирбит көрүүтэ-харайыыта биллэ мөлтөөн иһэринэн сибээстээн, хас биирдии ыал бөҕүн-саҕын оҕолорунан бөх тоҕор сиргэ тохторору бобуу.
7) Хас биирдии тиэргэҥҥэ оҕо спордунан, чөл олоҕунан дьарыктанарыгар сөптөөх площадкалары оҥостуу, кыратыттан улаханыгар дылы олохтоохтор хаалыктаах хаамыынан, хайыһарынан о. д. а. спорт көрүҥнэринэн дьарыктаналларын ситиһии.
Онон, бу сонун көрсүһүүнү көҕүлээбит уонна хас биирдии ыал олоҕо тупсарыгар Барылын билиһиннэрбит киһибитигэр Мария Архиповнаҕа биэчэр кыттыылаахтарын, бары олохтоохторун аатыттан махталбытын тиэрдэбит.