Алтынньы 17 күнүнээҕи өрөбүл сарсыардатыгар Кыстатыам олохтоохторо Владимиров аппатыгар тоҕуоруһа муһуннулар. Манна үгэскэ кубулуйбут «Күөгү — 2026» күрэх ыытылынна. Санатан эттэххэ маннык күрэҕи ыытарга Мария Ильинова, Азалия Григорьева тыл көтөҕөн, этии киллэрбиттэрэ. Онтон 2009 сылтан, дьон сэҥээриэх курдугун билэн, бэйэтинэн улахан бириистэри туруоран, лотерея оонньотон өссө тупсаран, күүстээхтик күҺүҥҥү балыктааҺыны көҕүлээбит, үгэскэ кубулуппут киҺинэн кыстатыамнар «Натаара» община баҺылыга, Кыстатыам бочуоттаах олохтооҕо, хоту дойду хоҺуун хотуна Анастасия Ивановна Петрованы ааттыыллар.
Бары мустубуттарын кэннэ, үгэс быһыытынан, Өлүөнэ Эбэҕэ сүгүрүйэн туран, аал уоту аһатыы, күндүлээһин сиэрэ-туома ыытылынна. Ол кэннэ, нэһилиэк аҕа баһылыга Артур Ильинов эҕэрдэ тылын биир дойдулаахтарыгар тиэртэ. Күрэх кылаабынай судьуйата Леонид Михайлов күрэх быраабылатын кыттааччыларга билиһиннэрдэ. Күрэхтэһээччилэр алгыс сиэрин-туомун ааһан, балыктыыр сир булунан малларын туппутунан күрэхтэһэ киирдилэр. Күрэххэ барыта 26 улахан киһи уонна 20 оҕо кытынна, бу хаһааҥҥытааҕар да элбэх көрдөрүү буолла. Быйылгы күрэхпит 15-с сылын ыытыллар, онон оҕолуун-улаханныын бары да үөрүйэхтээхтик балыктыыр буолбуттар. Саамай аҕа саастаах кыттааччыларбытынан Мария уонна Алексей Сергеевтэр буоллулар. Син балачча балыктаабыттарын кэннэ, бастакы балыгы Василий Корякин хаптарда. Үс чаастаах балыктааһын устата оҕолор оонньоон да биэрдилэр. Манна хайгыаҕы баҕарыллар, Анна Георгиевна Семенованы, оҕолорун хаҥкылаах киллэрэн, чараас хаардаах мууска дэлби хаҥкылаатылар. Онон, инникитин төрөппүттэр оҕолорго маннык сынньалаҥы тэрийэллэрэ буоллар диэн баҕа санаа баар. Быыска-арыкка кулууп үлэһиттэрэ хаартыскаҕа да түһэрдилэр, видеоҕа интервью да ыллылар, квадракоптеры да көтүттүлэр. Дьэ уонна буоларын курдук, бу да сырыыга Варвара Иннокентьевна олох буруолуу сылдьар бэрэскитин, морсун күрэх кыттыылаахтарыгар атыылаан, күүс-сэниэ эбилиннилэр. Онтон эрдэттэн оттуллубут балааккаҕа Лена Эдуардовна, Прасковья Петровна былыр үйэҕэ балыктарын миинэ, итии чэйдэрэ балыксыттары күүтэн оргуйан бидилийэ турда. Маннык туран биэрбит халлааҥҥа, хайабыт сирэйин анныгар тоҕуоруһа мустубут дьоҥҥо, аҕыйах бириэмэ иһигэр ис иһиттэн иэйэн-куойан туран суруйбут Юрий Сергеев хоһооннорунан ырыалар иһиллэн балыксыттар сүргэлэрин көтөхтө. Дьэ маннык кэрэ күнү бэлэхтээбит, дьону аҥардас күрэххэ эрэ буолбакка, сибиэһэй салгыҥҥа сылдьан сэргэхсийэллэрин тэрийбит киһибитигэр Анастасия Ивановнаҕа махталбытын тиэрдэбит. Кини быйыл 75 сааһын туолла. Онон тэрээһин кини үбүлүөйүгэр ананна.
Тэрээһин иккис чааһынан «Нулгин» сынньалаҥ киинигэр «Ийэҕэ махтал!» биэчэр буолла. Биэчэр оскуола үрдүкү кылааһын үөрэнээччилэрэ «Ийэ мичээрэ» композициялаах ырыаларынан саҕаланна. Тэрээһин Кыстатыам бары Ийэлэрин эҕэрдэлээн туран, биэчэр үбүлүөйдээх Анастасия Ивановна Петроваҕа ананна. Кини үлэлээн-хамнаан кэлбит кэмнэрин слайда нөҥүө сырдатан туран билиһиннэрии барда. Ол кэннэ, нэһилиэк баһылыга Артур Ильинов олохтоох дьаһалта аатыттан эҕэрдэлээн туран сэмэй бэлэҕин туттарда. Салгыы алын сүһүөх кылаас оҕолоро бары тахсан «Мама» диэн ырыаларын ыллаан дьиэрэттилэр. Дьэ, ити кэннэ, Анастасия Ивановна бэйэтин баҕа санаатын толорон «Строганина» күрэҕэ ыытылынна. Маҥнайгы холонуу буолан, үс эдэр уол кытынна. Үс түһүмэхтээх күрэх түмүгүнэн 1 миэстэни Дмитрий Петеримов ылла уонна «Хоту» маҕаһыынтан өтүү быатын тута, 2 миэстэ — Иннокентий Слепцов, эмиэ «Хоту» маҕаһыынтан өтүү быата, 3 миэстэ — Ярик Винокуров «Лена» маҕаһыынтан термос тутта. Салгыы, үс улахан тэрилтэ бөлөхтөрө тахсан тыл этэн туран, эҕэрдэ нүөмэрдэрин тиэртилэр. Ол кэннэ күүтүүлээх үбүлүөйдээх лотерея оонньонно. Урукку кэмҥэ, киирбит взнос харчытыгар эрэ лотерея оонньонор эбит буоллаҕына, бу сырыыга элбэх араас сүүйүүлээх бириистэр турдулар. Ол курдук, кулинарияны толору баһылаабыт бэйэбит кыыспыт Сусанна Винокуроваттан бэрт тотоойу, сонун, олох дьиҥнээх курдук балык оҥоһуулаах торт оонньонно. Ону ааһан, бэйэ илиитинэн оҥоһуллубут киэргэллэр, араас суумалаах харчылар уонна үксэ үбүлүөйдээх Анастасия Ивановнаттан, ордук үрүҥ көмүс киэргэллэр оонньоннулар. Онтон, 8400 солк. суумалаах сүрүн бирииһи сүүйдэ Аскалон Иванов.
Уонна тэрээһин сүрүн чааһын, хас биирдии киһи сүрэҕин таарыйар тыллардаах «Ийэҕит баарына харыстааҥ!» диэн хоһоону ааҕан, Варвара Ивановна түмүктээтэ. Дьэ, онтон, бу икки чаастаах тэрээһини саҕалаабыт, бэйэтэ эмиэ 15 сыллаах үбүлүөйдээх «Күөгү-2026» күрэх түмүгэ тахсар чааһа тирээн кэллэ, онон быйылгы күрэх кыайыылаахтарынан буоллулар: «Первый улов» анал аат — Василий Корякин («Удача» маҕаһыынтан 3 тыһ. солк. Суумалаах сертификат), «Маленькая рыба» — Иннокентий Сергеев («Чараҥ» маҕаһыынтан фонарик). «Большая рыба» — Айгылаан Константинов («Орхидея» маҕаһыынтан мангал), «Юный рыбак с уловом» — Адриан Николаев («Игрушки — текстиль» маҕаһыынтан оонньуур), «Женщина рыбак» — Мария Дьяконова (Ольга Евгеньевнаттан люстра), «Рыбацкая семья» – Мария уонна Тимур Устиновтар (Анастасия Ивановнаттан фонарь уонна сахалыы чэй набора),.
Быйылгы «Күөгү-2026» күрэх кыайыылаахтарынан таҕыстылар: 3 миэстэ — Петр Иванов (аппарат «Торпедо» Анастасия Ивановнаттан уонна Лииндэ нэһилиэгин дьаһалтатыттан 20 лиитэрэ уматык), 2 миэстэ — Василий Корякин (Кыстатыам дьаһалтатыттан сварочнай аппарат уонна «Тэтим» маҕаһыынтан сертификат), 1 миэстэ — Владислав Николаев (Анастасия Ивановнаттан «электроледобур» уонна Эдьигээн нэһилиэгин дьаһалтатыттан 50 лиитэрэ уматык).
Дьэ, ити курдук, Кыстатыам олохтоохторо бары сөптөөх, сыаналаах бириистэри тутан, үөрэн-көтөн тарҕастылар Ол эрэн, биэчэр түмүгэр тэрийээччилэргэ махтанан туран туран, нэҺилиэк инникии сайдыытыгар диэн туран Олохтоох көҕүлээһиннэри өйүүр бырагыраама (ППМИ) уулусса уотугар киирсэргэ куоластааҺын кыайбытынан уопсай хаартыскаҕа түҺүү буолла.
Надежда Сергеева, общ.корр.