Бу күннэргэ Кыстатыам олохтоохторо ким туох сатанарынан биир дойдулаахтара Татьяна Ермолаева дьиэ кэргэнинэн дьону сынньатар база туттар санаалааҕын өйөөн субуотунньуктарга тахсаллар.
Татьяна Ивановна дьону сынньатар турбаза тэринэр санааны иитийэхтээбитэ син ыраатта. Бэйэтин бөһүөлэгин олохтоохторун, атын да сиртэн кэлэр дьон сынньанар, айылҕаттан күүс-сэниэ ылынар усулуобуйатын тэрийиэххэ сөбүн сыныйан үөрэппитэ. Ол гынан баран дьэ быйыл онтун олоххо киллэрэр санаалаах ылсан эрэр. Базаланар сиринэн Кыстатыам бириистэнин аттынан миэстэни талбыттар. Манан улуу Өлүөнэ өрүс ааһар, сылаас күннэргэ сынньана кэлээччилэр сөтүөлүөхтэрин, кумахха сыламныахтарын сөп. Ону сэргэ манан балыктыырга күөгүлүүргэ да, илим түһэрэргэ да табыгастаах сир. Сайын саҕаланыаҕыттан кэргэнин Николайы кытта Татьяна Ивановна үлэ хамнас үгэнигэр сылдьаллар. Билиҥҥитэ манна дьон сынньанарыгар, аһыырыгар сөптөөх ураһалар тутулуннулар. Бэйэ балааккалаах кэлэн туруорунарга эмиэ миэстэ көрүллэр. Хаһаайыттар аны баанньык тутар санаалаахтар.
Манна миэстэни талахтартан, оттон-мастан ыраастааһын, солооһун, дьон сылдьарыгар табыгастаах гына сири-уоту оҥоруу үлэтэ элбэхтик барыан наада. Ол иһин олохтоох дьон быыс буоллулар да, санааларыттан кэлэн, көмөлөһөллөр Татьяна Ивановналааҕы саҥа дьыалаҕа ылсалларын биһирээн, өйүүллэр. Аҕыйах хонуктааҕыта кулууп үлэһиттэрэ манна дьону түмэн, көмөлөһө тахса сырыттылар.
