Тохсунньу 15 күнүгэр Кыстатыамнааҕы олохтоох дьаһалтабыт сыллааҕы үлэтин отчуоттаата. Манна тустаах биричиинэнэн бюджет чааһыгар баһылык солбуйааччыта Т.В. Кириллина кыттыыны ылбата, онон бюджекка сыһыаннаах иһитиннэриини нэһилиэнньэҕэ тиэрдиэхпит диэн туран нэһилиэк аҕа баһылыга А.К. Ильинов отчуотун саҕалаата. Отчуокка сыл устата нэһилиэккэ туох үлэ барбыта слайда нөҥүө көрдөрүлүннэ. Ааспыт сылга барбыт улахан үлэлэринэн буоллулар: дьаһалтаҕа ыскылаат тутуута, суол оҥоруута, араас хайысхалаах субуотунньуктар, 4G холбонуута, СВО-ҕа нэһилиэк дьоно күүс-көмө оҥорбуттара, элбэх квартиралаах икки эргэ дьиэ көтүрүлүннэ, амбулатория иһинэн аптека аһылынна, баһаары утары минерализованнай балаһаҕа үлэ барда, суол бэлиэлэрэ турдулар,элбэх үбү эрэйбит нэһилиэк 70 сыллаах үбүлүөйүн бэлиэтээһин дьаһаллара ыытылыннылар. Онтон үүммүт 2025 сылга барыахтаах үлэлэргэ болҕомто туһаайылынна. ППМИ (олохтоох көҕүлээһиннэри өйүүр программа) программаҕа киирсэн, тупсаран тутууга, ол эбэтэр, Кыайыы 80 сылыгар сөп түбэһиннэрэн, 2 мөл. солк. “Сквер Славы» бырайыак көмүскэннэ. Сынньалаҥ пааркатыгар фонтан тутуута, эбии беседкалаах, ыскамыайкалардаах, футбольнай былаһаакка тутуута, вертолет түһэр былаһааккатын уоттаан-күөстээн саҥардыы, анал миэстэлэргэ видеокамералары туруоруу, музей территориятын саҥардыы, уулуссаны сырдатар уоттары элбэтии, бириистэҥҥэ туристическай базаны сайыннарыы. Онон, элбэх үлэ бараары турарынан, дьон сайыҥҥы үлэлэргэ көхтөөхтүк кыттыһалларыгар баһылык баҕа санаатын тиэртэ.
“Нулгин» кулууп директора Н.Н. Сергеева, үгэскэ кубулуйбут, быйыл Кыайыы 80 сылыгар аналлаах кулун тутар 17-22 күннэригэр ыытыллыахтаах “Дни поселений» фестиваль балаһыанньатын билиһиннэрдэ.
Н.М. Иванова, “Туйаара» уһуйаан сэбиэдиссэйэ «Южнай, Корнилов уулуссалар хабыс хараҥалар, хаһан уот тардаллар?» диэн боппуруоһугар “Проводтара быһыллан тураллар, халлаан сылыйдар эрэ, электрик булан, уларыттарыахпыт, лаампалар кэлбиттэрэ”, диэн эппиэттэнилиннэ. Винокурова Т.Т., оскуола учуутала, «Интернет киирбитинэн сибээстээн, кулуупка киинэ көрдөрүөхтэрэ дуо” диэн интэриэһиргээтэ. Онуоха «Оборудованиеҕа үп көрүөххэ наада. Киинэ көрдөрүүтүн туһунан кулууп үлэһиттэрэ быһаарса олороллор» диэн быһаарылынна. Кулууп тымныытын боппуруоһа эмиэ таарылынна. Үп-харчы тыыран, аны сайын сылаас туалет, күүлэ туттарыахха наадата этилиннэ.Түүлээх таҥаһы тигэр сыах Татьяна Ермолаева көҕүлээһининэн арыллыбыта биһирэннэ, салгыы иистэнньэҥнэри түмэн, араас быыстапкаларга кытыннарыахха наадата ыйылынна. Түмүккэ, Артур Константинович, биир үөрүүлээх сонун кэлбитин тиэртэ, ол буолар, быйыл биһиги нэһилиэккэ Оптоволокно тардыллара буолла, онон мунньах кыттыылаахтара, сонуну үөрэ иһиттилэр.
Мустубут дьон нэһилиэк баһылыгын отчуотун биһирииллэрин биллэрдилэр.