Бу дьыл муус устар 19 күнүгэр Кыстатыам нэһилиэгэр “Олохтоохтору хаарбах дьиэлэртэн көһөрүү” программанан 8 квартиралаах саҥа дьиэ үөрүүлээх арыллыыта буолан ааспыта. Дьиэлээхтэр номнуо квартираларын оҥостон көһөн олороллор.
Бу күннэргэ саҥа дьиэ хаһаайыттара Раиса уонна Иван Соломоновтар уонна Надежда Марксовна Семенова саҥа дьиэҕэ көһөн олорор үөрүүлэрин үллэстээри, бииргэ үлэлиир дьоннорун-сэргэлэрин малаһыыҥҥа ыҥырдылар. Үгэс быһыытынан, бу күн алаһа дьиэни айах тутан аһатыы, дьиэни ыраастааһын, дьиэлээхтэргэ эйэҕэс эҕэрдэ тыл этилиннэ.
Онон, биһиги ытыктыыр киһибит, алгыһынан арчылыырга үөрүйэхтэри баһылаабыт, СӨ үөрэҕириитин туйгуна Мария Сергеевна Васильева малаһыын сиэрин-туомун ыытта. Аал уоту аһатан, квартиралары, кэлбит дьону ыраастаан, алгыс тылын-өһүн тиэртэ. Салгыы урукку уонна билиҥҥи оскуола директордара коллегаларыгар, саҥа дьиэ хаһаайыттарыгар эҕэрдэ тылларын тиэртилэр. Дьиэлээхтэр сып-сылаас, сып-сырдык дьиэлэрин номнуо дьиэтитэн, быр-бааччы олороллоро көстөр. Кэлбит ыалдьыттар дьиэлэринэн сылдьан, сөҕө-махтайа, көрөн-истэн экскурсиялаатылар. Салгыы Раиса уонна Надежда бииргэ үлэлиир кэллэктииптэрин оскуолаҕа, өлгөм астаах остуолларыгар маанылаан ыҥырдылар.
2022 сыллаахха Кыстатыамҥа 12 квартиралаах дьиэ тутуллан үлэҕэ киирбитэ. Ону таһынан, куоракка 20-чэ ыал дьиэ ыларга уочаракка тураллар уонна кэлэр сылга 6 квартиралаах дьиэ тутуута былааҥҥа турара биһигини үөрдэр. Онон, биһиги нэһилиэк «Хаарбах туруктаах дьиэлэртэн дьону көһөрүү» барылга киирсэн, тэҥҥэ баран иһэбит, ону бэҕэһээҥҥи тэрээһин өссө туоһулаан биэрдэ.
Онон, олохтоохторго үөрүү тосхойдоҕуна, барыбыт үөрүүбүт буоллун диэн, саҥа дьиэлээхтэргэ өрүү үөрүүгүт үксүү турдун, саҥа дьиэҕитигэр куруук күлүү-оонньуу, дьол, таптал, өйдөһүү, ытыктабыл уйаланнын диэн алгыстаах эҕэрдэбитин тиэрдэбит!
Надежда Сергеева, общ.корр.