#Якутия, вперёд!
Эдьигээн оройуонугар “Олохтоохтору хаарбах дьиэлэртэн көһөрүү” федеральнай программа тэтимнээхтик ыытыллар. Оройуон киинигэр эрэ буолбакка нэһилиэктэргэ эмиэ үлэ барар. Ол курдук, балаҕан ыйын 7 күнүгэр анал программанан Эдьигээн оройуонун Кыстатыам нэһилиэгэр 12 квартиралаах аан бастакы саҥа уопсай дьиэ олоххо киирдэ.
Саҥа дьиэ үөрүүлээх арыллыытыгар ыраахтан-чугастан ыҥырыылаах ыалдьыттар, олохтоохтор тоҕуоруһа муһуннулар. Дьаһал олохтоох алгысчыт Мария Васильева аал уоту оттон айах тутуутуттан саҕаланна. «Солинга» ансамбыл кыргыттара кэрэ үҥкүүлэрин, «Далбар» ырыа ансамбыла эҕэрдэ ырыаларын бэлэх ууннулар. Оройуон баһылыга Василий Сорокин уонна Кыстатыам нэһилиэгин баһылыгын эбээһинэһин толорооччу Татьяна Кириллина эҕэрдэ тылларын эттилэр, аалай лиэнтэни быстылар. “Үрдэл” тутуу тэрилтэтин салайааччытыгар уонна үлэһиттэригэр махтал суруктары туттардылар. Салгыы саҥа дьиэ символическай күлүүһүн бэдирээччит олохтоох дьаһалтаҕа туттарда. Ол кэннэ үөрүүлээх быһыыга-майгыга нэһилиэк дьаһалтата саҥа дьиэ хаһаайыттарыгар күлүүстэри уонна өйдөбүнньүк бэлэхтэри туттартаата.
— Кыстатыам нэһилиэгэр 2016 сыллаахха 10 дьиэ хаарбах туруктааҕынан билиниллибитэ. Олортон бастакынан 12 квартиралаах, икки этээстээх дьиэ үлэҕэ киирдэ. Саҥа дьиэни “Үрдэл” олохтоох тутуу тэрилтэтэ, салайааччы Жанна Иванова, биир сыл иһигэр тутан бүтэрдэ. Быйыл өссө “Хаарбах дьиэлэртэн олохтоохтору көһөрүү” программанан икки аҕыстыы квартиралаах дьиэлэри тутуу саҕаланыахтаах, сирэ бэлэм турар. Онтон 2025 сыл кэнниттэн хаалбыт хаарбах дьиэлэри эмиэ бу программаҕа киллэрэр былааннаахпыт, — диэн сырдатта «Кыстатыам» эбэҥки муниципальнай тэриллии баһылыгын эбээһинэһин толорооччу Татьяна Кириллина.
Үөрүүлээх арыллыы кэнниттэн саҥа дьиэни көрүү-истии буолла. 80-с сылларга тутуллубут хаарбах дьиэҕэ хара маҥнайгыттан кэриэтэ олорбут Татьяна Бурцева саҥа дьиэтигэр бастакы ыалдьыттарын үөрэ-көтө көрүстэ.
-Мин Намнааҕы педучилищены бүтэрэн баран үс сыл Уус-Алдан улууһугар үлэлээбитим. Онтон 70-с сс. дойдубар Кыстатыамҥа көһөн кэлэн быстах хас да дьиэҕэ олорбутум. Онтон 80-с сылларга саҥа панель дьиэ тутуллубута. Оччолорго сэбиэт бэрэссэдээтэлинэн үлэлээбит Мария Архиповна Харитоноваҕа дьиэ көрдөөн заявление суруйбутум. Ол түмүгэр, ол дьиэҕэ олорбут Антонина Николаевна Егорова атын дьиэҕэ көһөн, кини олорбут квартиратын миэхэ биэрбиттэрэ. Онтон ыла 30 тахса сыл ол дьиэҕэ олорон кэллим. Ыаллыы олорор дьоммун кытта эйэ-дэмнээхтик, үчүгэй баҕайытык олорон кэллибит. Кэнники дьиэбит эргэрэн тымныы баҕайы буолбута. Онтон бүгүн саҥа дьиэ күлүүһүн тутан үөрэн, долгуйан турабын. Дьэ, мантан ыла сылаас, сырдык, толору хааччыллыылаах дьиэҕэ үөрэ-көтө, этэҥҥэ олорор буоллахпыт. Бу дьиэ тутуллан олоххо киирэригэр күүс-көмө буолбут, үлэни ыыппыт дьоммутугар барҕа махталбытын тиэрдэбит,- диэн үөрүүтүн үллэһиннэ саҥа дьиэ олохтооҕо Татьяна Бурцева.
Оройуон үрдүнэн хаарбах дьиэттэн дьону көһөрүү бырагырааматын бастакы түһүмэҕэр, ол эбэтэр 2019-2025 сылларга 100 тахса киһи саҥа дьиэнэн хааччыллара былааннанар.