СӨИл Дархана Айсен Николаев уурааҕынан 2024 сыл Оҕо саас сылынан биллэриллибитэ. Оҕо саас сылыгар аналлаах муус устар 5-6 күннэригэр аан бастакытын «Мы — вместе» оройуоннааҕы оҕолор общественнай хамсааһыннарын сүлүөтэ буолан ааспыта. Бу тэрээһиҥҥэ оройуон бары оскуолаларыттан уонна эбии үөрэхтээһин тэрилтэлэриттэн 6 хамаанда кыттыыны ылбыттара. Икки күннээх сүлүөт түмүгүнэн Кыстатыам орто оскуолатын иһинэн үлэлиир «Серун» түмсүү кыайыылааҕынан ааттаммыта. Бу кыайыыларыттан кынаттанан «Серун» оҕо общественнай хамсааһына Бэстээх уонна Лииндэ оскуолаларын үөрэнээччилэрин кытта тиийэн көрсүһэн, тэрээһиннэри ыыттылар.
-Кыстатыам орто оскуолатын иһинэн үлэлиир «Серун» оҕо общественнай хамсааһына тэриллибитэ үһүс сыла. Биһиги түмсүүбүтүгэр 7-11 кылаас көхтөөх үөрэнээччилэрэ киирэллэр. Эрдэ оскуолабыт эрэ иһигэр тэрээһиннэри, үлэни ыытар этибит. Онтон быйыл оройуоҥҥа аан бастакытын ыытыллыбыт сүлүөккэ кыайан-хотон, онтон кынаттанан, салайааччыбытынаан Ильинова Варвара Константиновнаны кытта сүбэлэһэн Лииндэ уонна Бэстээх нэһилиэктэригэр 9 буолан тиийэн оскуола оҕолорун кытта көрсүһүү тэрийэргэ санаммыппыт. Оҕолору кытта билсэ-көрсө, алтыһа, салгыы бииргэ үлэлиир туһунан илии баттаһа диэн сыаллаах-соруктаах ыраах айаҥҥа туруммуппут. Кыстатыамтан киэһэ 21 чааска массыынанан айаннаан Бэстээххэ сарсыарда 7 чааска тиийбиппит. Оскуола коллектива уонна үөрэнээччилэрэ биһигини үөрэ-көтө көрсүбүттэрэ. Бастатан туран, оскуола самоуправлениятын оҕолорун кытта төгүрүк остуол тэрийдибит. Көрсүһүү түмүгүнэн Бэстээх уонна Кыстатыам оскуолаларын президеннэрэ инникитин бииргэ үлэлиир туһунан илии баттастылар. Салгыы оҕолор талааннарын көрдөрөр бэрт сэргэх мастер-кылаастар ыытылыннылар. Ол кэннэ биһиги – ыалдьыттар кылгас концерт көрдөрдүбүт, «Көрдөөх стартар» күрэххэ күөн көрүстүбүт. Тэрээһиннэрбитин түмүктээн баран Бэстээх оскуолатын үөрэнээччилэрин кытта ирэ-хоро кэпсэтэ-кэпсэтэ дэриэбинэни көрдүбүт-иһиттибит. Ол кэннэ салгыы Баахынайга 3 чаас айаннаан тиийдибит. Баахынай дьоно-сэргэтэ ыалдьыттарын эмиэ үөрэ-көтө көрүстэ. Оскуола оҕолоро хас биирдии тэрээһиннэрбитигэр эмиэ көхтөөх кыттыыны ыллылар.
Ити курдук «Серун» оҕо общественнай хамсааһына оройуоммут икки нэһилиэктэригэр ыалдьыттаан, сыалбытын-сорукпутун ситиһэн, бириэмэбитин туһалаахтык атааран, оҕолору кытта билсэн-көрсөн кэлбиппит. Инникитин Бэстээх, Баахынай уонна Эдьигээн оскуолаларын общественнай хамсааһыннарын Кыстатыамҥа күүтэбит. Түгэнинэн туһанан, Бэстээх уонна Лииндэ оскуолаларын коллективтарыгар, үөрэнээччилэригэр биһиги этиибитин ылынан, үөрэ-көтө, аһатан-сиэтэн көрсүбүттэригэр барҕа махталбытын тиэрдэбит. Ону сэргэ биһиги көҕүлээһиммитин өйөөбүт, баҕа санаабытын олоххо киллэрбит Кыстатыам оскуолатын директорыгар Людмила Ильинична Ефимоваҕа махталбытын биллэрэбит. Улууспутугар аан бастакытын ыытыллыбыт «Мы — вместе» оҕолор общественнай хамсааһыннарын сүлүөтэ тэриллибитин олус биһирээтибит, онон тэрийээччилэргэ махтал буолуохтун. Маннык тэрээһиннэр оҕолор талааннарын уонна кыахтарын арыйаллар, сомоҕолууллар дии саныыбыт. Оскуолалары кытта илии баттаһыыбыт түмүгүнэн оскуола активтарын кытта социальнай ситимҥэ бөлөх арынныбыт. Бу бөлөххө кэтэхтэн күрэхтэри ыытабыт, кэпсэтэбит, уопут атастаһабыт. Кыайыы күнүн көрсө хоһоон күрэҕин ыытар былааннаахпыт, — диэн кэпсээтилэр «Серун» түмсүү кыттыылаахтара Саша Васильева уонна Туяна Семенова.