Россия күнүн көрсө Кыстатыам олохтоохторо ветераннарга аналлаах сквердэригэр түмүстүлэр. Манна нэһилиэк библиотекара Анна Гоголева -Семенова Россия судаарыстыбаннай суверенитетын туһунан Декларация суолтатын билиһиннэрдэ, дойдуга таптал, патриотизм туһунан уус-уран литература быыстапкатын тэрийдэ. Нэһилиэк баһылыга Артур Ильинов эҕэрдэтин тириэртэ.
Россия күнүн бырааһынньыгар кэлээччилэр бары сайыҥҥы сибэкки рассадатын тутан кэлбиттэрэ. Онон миитин кэннэ, бары сквер тула сибэкки олордорго ылыстылар.Тэрээһиҥҥэ оскуола иһинэн тэриллибит «Гиркив» лааҕыр оҕолоро кытыннылар, манна 20 оскуола о5ото сынньанар. Быйыл Кыстатыам бөһүөлэгэ тэриллибитэ 70 сылын бэлиэтиэхтээхтэр. Итинэн сибээстээн манна элбэх ырааһырдыы субуотунньуктара, кеҕердүү, киэргэтии үлэтэ көхтөөхтүк ыытыллар. Үлэ түмүктэниитэ дьаһалта аатыттан сибэкки олордуутун кыттыылаахтарын сибиэһэй арбуһунан күндүлээтилэр. Бу күннэргэ навигация саҕаланна, онон сонун ас-үөл тиэрдиллэн, ордук оҕолорго үөрүү үксээтэ.