Күн уота сылаанньытар Сандал сааһы көрсө, Лииндэ нэһилиэгэр түөлбэлэр икки ардыларыгар күрэх буолан ааста. Тэрээһин олус сэргэхтик, элбэх киһини түмэн, дохсун ытыс тыаһын ортотугар ыытылынна.
Хас биирдии түөлбэ бэйэтин кыаҕын, дьоҕурун уонна сомоҕолоһуутун маннык түһүмэхтэргэ көрдөрдө: 1) Хамаандалар бэйэ оҥоһуулаах былаахтарын көрдөрдүлэр уонна ис хоһоонун кэпсээн сиһилээтилэр. 2) Нэһилиэк иһэ араас кэрэ, улахан уонна мааны хаар дьонунан тупсубута. Судьуйалар хаачыстыбатын уонна киэргэтиллиитин сыаналаатылар. 3) «Сандал саас» диэн ааттаах хаартыскаҕа түһэр сир (фотозона) дьон биһирэбилин ылла. 4) Бириэмэҕэ отуу оттон, хаар уулларан чэй өрүүгэ дьиҥнээх сатабыл тахсыбыта. 5) Хаарынан сыал быраҕыы, оҕону харыытанан соһон сүүрүү, хайыһардааһын уонна бэрэбинэ үрдүгэр туран куулунан охсуһуу көрөөччүлэри олус астыннарда. 6) Түөлбэлэр атын норуоттар үҥкүүлэрин толорон, тэрээһини өссө киэргэттилэр. 7) Сүрүн күрэхтэр таһынан остуолбаҕа ыттыы уонна оҕолорго наартыны ыстаныы буолла.
Түөлбэлэринэн уопсай түмүк: 1 миэстэ — «Севернай» түөлбэ (10 000 солк. сэртипикээт). 2 миэстэ — «Молодежнай» түөлбэ. 3 миэстэ — «Центральнай» түөлбэ.
Оҕолорго наартыны ыстаныы: 1 миэстэ — Николаев Павел; 2 миэстэ — Петров Данил; 3 миэстэ — Карамзина Каролина
Хайыһарга бастыҥнар: 1 миэстэ — Дмитриев Артем; 2 миэстэ — Никитин Айаан; 3 миэстэ — Болтунов Юра
Тэрээһин биир долгутуулаах түгэнинэн — Лииндэ нэһилиэгин 14 сыл устата ситиһиилээхтик салайбыт Николай Иванович Антоновка биир дойдулаахтарын истиҥ махталлара буолла. Билигин атын эппиэтинэстээх үлэҕэ анаммыт Николай Ивановиһы олохтоохтор элбэх сыллаах сыралаах үлэтин, дьоҥҥо үтүө сыһыанын иһин үрдүктүк сыаналаан, барҕа махталларын тылларын кытта анал бэлэх туттардылар.
«Сандал саас» оонньуулара Лииндэ олохтоохторугар өрө көтөҕүллүүлээх санааны, сомоҕолоһууну уонна саас кэлиитин үөрүүтүн бэлэхтээтэ!