Тохсунньу 13 күнүгэр Кыстатыамҥа оройуон баһылыгын эбээһинэһин толорооччу Дмитрий Татаринов салайааччылаах 4 киһилээх отчуоттуур биригээдэ кэлэн, Эдьигээн оройуона 2024 сылга туох-хайдах үлэлээн кэлбитин, сүрүн хайысхаларга тохтоон сырдаттылар. Оройуон экономическай сайдыытын управлениятын сүрүн специалиһа Ирина Желудева, оройуоннааҕы балыыһа кылаабынай бырааһа Владимир Татаринов, тыа хаһаайыстыбатын управлениятын начальнига Сергей Корякин иһитиннэриилэри оҥордулар, ыйытыыларга эппиэттээтилэр.
- Семенов Д.Е., пенсионер хас да боппуруоһу туруоруста. Ол курдук, оройуон киинигэр котельнайга тахсыбыт быһылаан барыбытын долгутта, онон сиэттэрэн котельнайга үлэлии сылдьар уолаттары эбии үерэттэрбэккит дуо. Врачебнай амбулатория тутуллуутун боппуруоһа быһаарылынна дуо? Федеральнай программанан эминэн-томунан хааччыйыы хайдах буолуой? Кыстатыам ыстаадатыгар хас таба баарын токкоолосто. Эппиэт маннык буолла. Коммунальнай хаһаайыстыба өттүгэр кадровай боппуруос күүскэ туруон наада, идэтийбит специалистар суохтара, опыта суох дьон үлэлиириттэн итинник балаһыанньа таҕыста. Врачебнай амбулатория иккис бигэргэтиини ааһарын күүтэбит, былааҥҥа тутуу 2025-2026 с.с. турар . Олох ыксаллаах кэмҥэ наадалаах туттуллар эмтэри, сыл саҕаланыыта сайаапкаҕа киллэртэриэххитин наада. Таба уопсай ахсаана билиҥҥи туругунан 758 төбө, ол иһиттэн сүтүктэр бааллар, сааскы ахсаан кэннэ чопчуланыаҕа. Кулун тутар 18-20 күннэригэр Дьокуускайга табаһыттар сийиэстэрэ буолар, мантан 9 киһилээх делегация кыттарга бэлэмнэнэр. Онтон 2026 сылга Эдьигээҥҥэ республиканскай табаһыттар Оонньуулара ыытыллара былааннанар.
Винокурова Т.Т., оскуола учуутала:” Быйыл да кыһыҥҥы суол мөлтөх, суол оҥорооччулары ким хонтуруоллуур. Бу күннэргэ Дьокуускайга НПК-ҕа кыттан кэллибит, атын оройуоннар оҕолорун хастыы да массыынаннан аҕаллылар, Эдьигээн суох,”- диэн бэлиэтээтэ. Онуоха : суол оҥоруутун “Монтаж» ХЭТ ылбыта, суол алдьаныыта күһүн оптоволокнону оҥоро кэлэллэригэр тахсыбыта, ити боппуруоһу бэйэлэрин кытта кэпсэтэн көтөҕүөхпүт. Автобустар нэһилиэк аайы бааллар, ол гынан баран, оҕолору илдьэр түгэҥҥэ элбэх ирдэбил турар, ГАИ арыаллыахтаах, медик барсыахтаах, диэн эппиэттээтилэр.
Оскуола директора Ефимова Л.И.биһиги котельнайбыт туругун эмиэ эрдэттэн хонтуруолга ылан көрүөххүтүн наада диэн туруоруста. Сергеева Н.Н., «Нулгин» ЭКК директора- Бары билэрбит курдук, Россияҕа да Саха сиригэр да 2025 сыл Аҕа дойдуну көмүскээччилэр сылларынан биллэрилиннэ, онтон оройуоҥҥа туох сыла буолбутун билбэппит, “Дни поселений» фестиваль балаһыанньатын эрдэттэн оҥоруохха уонна ыыталыахха наада. Маннык фестиваль түөрт сыл көтө-көтө буолара ордук дии саныыбын. Ол кэриэтэ бириис харчыта СВО-ҕа барыа этэ. Былырыын баччаҕа, бастыҥ нэһилиэк аатын ыларга куонкурус биллэриллибитэ, ол түмүгэ хаһан тахсыа5ын сураста. . Эппиэт: Афанасий Яковлевич Уваровскай быйыл 225 сааһын туоларынан, оройуоҥҥа сылбыт киниэхэ ананыа. Фестиваль быйыл Кыайыы сылыгар ананан барыа, хайдах барыахтаах торумун быһаарсыахпыт. Куонкурус түмүгэ кэлэр ыйга тахсыа.
Ил Эйгэ Дойду Аана Алтан Саһарҕа –Маннааҕы тыа хаһаайыстыбатыгар бэйэбит да бюджеппытыттан харчы көрүллүөн наада, манна саас үүнээйигэ буор аҕалтараары эрэйдэммиппит, үчүгэй техника, трактор да наада. Эппиэт: Бюджет үбэ сыллата кыччыыр. Нэһилиэккэ муниципальнай программа оҥоруоххутун сөп, депутаттар онно төһө кыалларынан үбүлээһин көрүөхтэрин наада. Ону таһынан улуус, республиканскай, федеральнай программаларга граннарга, соцконтракка киирсэн үлэлиэххэ сөп.
-Таба иитиитигэр олох дьиэ кэргэнинээн, оҕолорун илдьэ тахсыа этилэр. Туризмы сайыннарыыга, хайдах үлэлэһиэхтээхпитин билбэппит, онон манна кэлэн сүбэ-ама биэриэхтэрин наада.Спорка эмиэ сайдыы барыан наада, дьоммут туох да бэлэмэ суох күрэхтэһиилэргэ кытталлар, оччотугар дьону спорка угуйар курдук күүстээх пропаганда барыан наада, скандинавскайтан саҕалаан саахымат,дуобат да буоллун- диэн этиннэ ДЭС старшай масстара Григорий Корякин.
— Оройуоҥҥа аптека да, балыыһа да өттүттэн дьоҥҥо сыһыан мөлтөх, биһиги хас эмэ чааһынан, биир эмит күҥҥэ Эдьигээҥҥэ киирэбит. Онуоха запись эбэтэр онтон кэлээриҥ, диэн кэбэҕэс баҕайытык этэллэрин элбэхтик истэбит. Онон тыа дьонун көрүүгэ-истиигэ, дьоҥҥо сыһыан көнүөн наада, диэн санаатын эттэ нэһилиэк социальнай үлэһитэ Слепцова А.П.
Дьэ ити курдук, ыйытыылар да этиилэр да киирдилэр, онно сөптөөх хоруйдар да бардылар. Онтон мунньах бүтүүтэ, биһиги нэһилиэкпитигэр уол оҕоҕо бастакынан күн сирин көрдөрбүт төрөппүттэргэ Варвара, Виталий Устиновтарга анал бэлэх туттарылынна. Оройуон сыллааҕы отчуота “Биһириибит» диэн баһыйар куоластааһынынан түмүктэннэ, — диэн суруйда биһиги общественнай корреспондеммыт Надежда Сергеева.
