2024 сыл Эдьигээн оройуонугар сахалартан бастакы Олимпийскай чемпион, XX үйэ  биир саамай чаҕылхай тустууга Роман Дмитриев төрөөбүтэ 75 сылынан биллэриллибитэ. Роман Дмитриев 1949 сыл кулун тутар 7 күнүгэр Эдьигээн улууһун Бэстээх нэһилиэгэр элбэх оҕолоох дьиэ кэргэҥҥэ күн сирин көрбүтэ. Кулун тутар 7 күнүгэр Роман Дмитриев аатын сүгэр Бэстээх оскуолатыгар, киэн туттар биир дойдулаахтарын үбүлүөйдээх күнүн көрсө кэккэ тэрээһиннэр ыытылыннылар.

Бу күн оскуола үөрэнээччилэрэ, үлэһиттэрэ, нэһилиэнньэ кыттыылаах миитин буолла. Педагогическай үлэ бэтэрээннэрэ Далакырова А.Г., Афанасьева Н.Д., Николаева З.П. уонна нэһилиэк баһылыгын солбуйааччы Елена Степанова улуу спортсмены ахтан-санаан аастылар, кини үрдүк аатыгар сүгүрүйэр ис хоһоонноох тыллары эттилэр. Бэстээх нэһилиэгин баһылыга Петр Афанасьев, общественник Геннадий Мальцев уонна спортсмен оҕолор Роман Дмитриевка аналлаах постамеҥҥа венок уурдулар. Салгыы оскуола иһигэр Роман Дмитриевка чулуу спортсмен буоларын бэлиэтиир муннугу үөрүүлээхтик арыйыы буолла. Манна Олимпийскай чемпион кыһыл көмүс мэтээлин куоппуйата сүрүн миэстэни булла. Тэрээһиҥҥэ кэлбит дьон эрдэ видеоҕа уһуллубут «Сулус буолан умайдыҥ» испиктээҕи күөх экранынан көрдүлэр.

Үбүлүөйдээх бэлиэ тэрээһин биир сүрүн дьаһалынан төрдүс сылын  ыытыллар “Уолан ааҕыылара” диэн хоһоон ааҕыытын күрэҕэ буолла. Манна Бэстээх уонна Кыстатыам оскуолаларыттан бастыҥ хоһоон ааҕааччы уолаттар күөн көрүстүлэр. Күрэх түмүгүнэн кыайыылааҕынан Бэстээх оскуолатын 9 кылааһын үөрэнээччитэ Ариан Васильев ааттанна. Иккис миэстэҕэ Бэстээх оскуолатын 8 кылааһын үөрэнээччитэ Станислав Андросов уонна Кыстатыам оскуолатын 8 кылааһын үөрэнээччитэ Ярослав Винокуров таҕыстылар, үһүс миэстэҕэ Бэстээх оскуолатын 4 кылааһын үөрэнээччитэ Виниамин Гаврильев тигистэ. “Кэскиллээх ааҕааччы” диэн анал аат Кыстатыам оскуолатын үөрэнээччитигэр Арылхан Ильиновка иҥэрилиннэ.