Бүгүн Ийэ тыл күнүгэр “Дюмия” культура киининээҕи сиэр-туом ураһатыгар саха тылыгар сыһыаннаах тэрээһин сарсыарда эрдэттэн саҕаланна. Дьон өрө көтөҕүллэн, сахалыы таҥнан-симэнэн «Нөрүөн-нөргүй»диэн ис сүрэхтэн эҕэрдэлэһэ көрүстүлэр.
Тэрээһини “Дьүрүйээнэ”диэн саҥа тэриллибит фольклор бөлөҕүн кыттыылаахтара саҕалаатылар. Хомуска оонньоон, сахалыы хоһоон ааҕан, алаадьынан айах тутан, мустубут дьону түмэ тартылар. Тыл иччитигэр сүгүрүйүү туомун Михаил Ефимов ыытан, онтон салгыы кэпсэтиини иилээтэ саҕалаата. Былааннаммытын курдук, дьаһал “Ийэ тыл илгэтэ” диэн төгүрүк остуол быһыытынан ыытылынна. Культура киинин директорын солбуйааччы Александра Сивцева “Саха тылын билии-дьиэ кэргэн иитиитэ” диэн дакылаатынан сахалыы тыл-өс аныгы кэмҥэ туттуллуутун тула кэпсэтии олугун уурда. Александра Васильевна саха тылын тула үөскээбит быһыыга- майгыга оҕо сахалыы саҥарар таһыма намтаабыта дьайар диэтэ. Ол курдук, быйылгы үөрэх дьылыгар Эдьигээн оскуолатыгар сахалыы тыллаах бастакы кылааска баара суоҕа 3 оҕо үөрэнэ киирбит. Аныгы кэмҥэ саха оҕото сахалыы саҥардаҕына соһуйар, сөҕөр-махтайар түгэннэрбит да баар буоллулар, диэн бэлиэтээтэ.
Элбэх киһи кэпсэтиигэ кытынна. Ол курдук, Өймөкөөнтөн кэлбит ыалдьыт- норуот эмчитэ, хаар эбэ көтөрдөөх, тоҕус кырынаастаах Өймөкөн Аҕыйыкаанын удаҕана Кырынаас Маарыйа, үөрэх управлениетын начальнига Юрий Шамаев, «Эдиген һохто», “Северное сияние” фольклорнай ансамбллар салайааччылара Евдокия Алексеева, Дьокуускайтан кэлэ сылдьар Н.Д.Неустроев аатынан “SMART” библиотека үлэһитэ Уйгууна Григорьева, Эдьигээн оройуонун баһылыгын солбуйааччы Софья Ефремова,” Дэвэлчэн” о5о уһуйаанын сэбиэдиссэйэ Римма Егорова, тыа хаһаайыстыбатын управлениетын начальнига Сергей Корякин санааларын үллэһиннилэр. Сүнньүнэн, бары да оҕону саха тылыгар угуйуу кыра сааһыттан дьиэ кэргэнтэн, уһуйаантан саҕаланыахтаах диэн эттилэр. Ону сэргэ Юрий Егорович Эдьигээҥҥэ баар оҕо уһуйааннарыгар сахалыы бөлөхтөрү арыйыы тирээн кэлбитин ыйда, онно үлэ барыаҕа диэн иһитиннэрдэ.
