Бу күннэргэ Арассыыйа, аан дойду үрдүнэн Саха сирин аатырдыбыт чаҕылхай сулус, саха-рэп хамсааһынын төрүттээччи, ырыаһыт Джида — Гоша Васильев Эдьигээн оройуонугар ыалдьыттаата. Кини былырыын Дьокуускай куоракка 20 сыллаах улахан сольнай кэнсиэрин тэрийбитэ. Ол айар киэһэтин программатынан саҥа үлэҕэ киирбит Эдьигээннээҕи «Дюмия» этнокултуурунай сайдыы уонна норуот айымньытын киинигэр икки кэнсиэри туруорда.
Кэнсиэрин иннинэ Джида Эдьигээн орто оскуолатыгар ыалдьыттаата. Улахан кылаас үөрэнээччилэрэ саха-рэп маастарын кытта истиҥ көрсүһүүгэ сырыттылар. Джида оҕо сааһын, оскуолаҕа хайдах үөрэммитин, айар үлэтин хайдах саҕалаабытын, хоббитын туһунан кэпсээтэ. Оҕолор ыйытыыларын биэрдилэр.
-Мин Эдьигээҥҥэ аан бастакытын кэллим. Эйэҕэс майгылаах, бэйэлэрин култуураларын илдьэ сылдьар дьонноох-сэргэлээх, кэрэ айылҕалаах дойду диэн санаатым. Саҥа эбийиэктэр үлэҕэ киирбиттэрин бэлиэтии көрдүм, сайдыы барар эбит. Бүгүн Эдьигээн орто оскуолатын үөрэнээччилэрин кытта көрүстүм, олус истиҥ көрсүһүү буолла. Эдьигээн ыччатыгар үүнүүнү-сайдыыны, бары кэрэни-үтүөнү баҕарабын, — диэн кэпсээтэ Джида.
-Наһаа үчүгэй көрсүһүү буолла. Мин Джида ырыаларын сөбүлээн истэбин. Ордук о5о сааһын, хайдах биллиилээх ырыаһыт буола үүммүтүн сэҥээрэн иһиттим, — диэн санаатын үллэһиннэ 8 кылаас үөрэнээччитэ Саша Петров.
-Биһиги оскуолабытыгар биллиилээх ырыаһыт кэлэн ыалдьыттаабытыттан үөрдүбүт. Джида ийэтигэр тапталын, махталын, иллэҥ кэмигэр кинигэ ааҕарын сэҥээрэ иһиттим. Киниэхэ өссө да үрдүк ситиһиилэри баҕарабын, — диэн кэпсээтэ 8 кылаас үөрэнээччитэ Настя Мигалкина.
Бу күн киэһэтигэр саҥа култуура киинигэр балтараа чаас усталаах Джида кэнсиэрэ бэрт истиҥ сылаас тыыннаах ааста. Диэн иһитиннэрэр Эдьигээн орто оскуолатын медиа киинэ.