Оройуоммут ыһыаҕын үгэскэ кубулуйбут биир сүрүн «Түһүлгэбэр ыалдьыттааҥ» күрэҕэ быйыл икки эрэ кыттааччылаах буолла. Манна балаһыанньатын быһыытынан үлэ коллективтара, общественнай тэриллиилэр, аҕа уустарынан15 киһиттэн итэҕэһэ суох түмсэн кыттыахха сөп этэ. Түһүмэхтэрэ сыллата уларыйаллар, ол курдук быйылгы күрэххэ түһүлгэни көрүүнү таһынан, сцена5а тахсан саха норуотун төрүт культуратыгар композиция, «Саха тылын төһө билэҕин» ыйытыктарга хоруйдааһын, кумааҕыттан кырыйан дьиэ кэргэн (эр киһи, дьахтар, уол,кыыс) сахалыы таҥаһын авангарднай көрдөрүү ирдэниллэрэ.
Инньэ гынан күрэххэ доруобуйаларыгар хааччахтаах дьон Айталина Михайлова салайааччылаах «Дьулуур» общественнай тэрилтэлэрэ уонна «Лииндэ нэһилиэгэ» муниципальнай тэриллии (баһылык Антонов Н.И.) кыттыыны ыллылар. Ыһыахха түһүлгэни тэриниини сомоҕо, ил-эйэ бэлиэтэ диэн мээнэҕэ эппэттэр, чахчыта да быйыл бу икки тэрилтэ саамай түмсүүлээхтэрин, сомоҕолоохторун көрдөрдүлэр. «Дьулуурдарга» төрөппүттэрин көмөтүнэн, көҕүлээһининэн үксүн оҕолор кытыннылар, оттон Лииндэ нэһилиэгэ баһылыктарын Николай Ивановичтыын эдэрдиин эмэнниин бары көхтөөхтүк тэринэн кэлбиттэр. «Дьулуур» оҕолоро түһүлгэ5э киирэр аантан сэлэлии туран, күөх лабааларынан ыраастыы, үтүөнү баҕара көрүстүлэр. Балаҕаннарын иһигэр остуол хотойорунан ас-үөл тардыллыбыт. Саламаат, кымыс, алаадьы, лэппиэскэ халадьыаһыгар, куһугар, балыгар тиийэ ыалдьыттары көрүстэ. Дьүүллүүр сүбэ түһүлгэттэн тахсарыгар хомус тыаһыгар доҕуһуоллатан атаардылар. Лииндэ нэһилиэгэ икки сыллааҕыта Алгыстаах Хонууга ыһыах күн дьон-сэргэ түмсэригэр анаан улахан ураһа туттаран, күрүөлээн-хаһаалаан кэбиспитэ. Онон сыл ахсын Баахынайтан тиийэн кэлэн, Эдьигээҥҥэ олохсуйбут да лииндэлэр кытталлар. Быйыл да аҥардас Баахынайтан 30 киһи күргүөмүнэн айаннаан кэлэн, ыһыах көрүн көҕүлүттэн туттулар. Сахалыы таҥастаах кыргыттар сэлэлии туран,баһылыктара ураһатыттан утары тахсан, дьүүллүүр сүбэни алгыһынан көрүстүлэр. Остуолга хотугу саха күндүргэтэр астарын тэҥэ, араас күөллэртэн хостоммут бөдөҥ, эмис соболорун ыһаарылаан, үөлэн уурбуттар. Николай Иванович ыалдьыттарга бүгүҥҥү Лииндэ олоҕун-дьаһаҕын кэпсээтэ. Баахынайга ыччаттар ыал буолан, дьиэ туттан, олохсуйа хаалалларын, бүгүҥҥү ыһыах тэрээһинигэр эдэрдэр, оҕолор баһылаан-көһүлээн кытталларын тоһоҕолоон бэлиэтээтэ. Дьэ онон иккиэйэх да буоллаллар, ыччаттарын саха үтүө үгэстэригэр угуйар, сомоҕолоһор сыалы тутуһан, тэҥ баайыылаах тэрилтэлэр кытта сылдьалларыттан дьүүллүүр сүбэ чилиэннэрэ эгди буоллулар.
Иккис түһүмэххэ кыттарга түһүлгэлэри сыанаҕа ыҥырдылар. Фольклор көрүүтүгэр «Дьулуур» о5олоро тахсан, олоҥхо тылын баайын билиһиннэрдилэр, хомуска оҕустулар, чабырҕаҕы, норуот ырыатын толордулар. Онтон Лииндэ түмсүүтэ «Тимир куйахтаах Дьурантай бухатыыр» диэн олоҥхону туруордулар. Олоҥхо тылын-өһүн Яна Корякина кэпсээтэ. Оруоллары толордулар:Тукулаана Куо- Саина Охлопкова. Дьурантай бухатыыр — Владимир Мандаров, Тукулаана Куо төрөппүттэрэ Бопхо баай- Николай Антонов, Чуучаала хотун уонна Аартык иччитэ — Марианна Ильинова,кыыс доҕотторо — Варя Григорьева,Каролина Карамзина, Лилия Николаева, Динара Васильева, Ангелия Третьякова, Тимир Чыыбыстай- Лианна Иванова , Уруц Айыы ойуун -Аида Обулахова, Кыаханньа кыыс- Нина Слепцова. Олоҥхо уларыйа турар көстүүлэрин таба тутан, сыананы тупсардылар Изабелла Андреева, Ульяна Ильинова, Татьяна Иванова, Алгысаайа Слепцова, Венера Васильева, Любовь Васильева, Анна Николаева, Сардаана Васильева, Татьяна Ефимова. Музыкатын таҥна Снежана Руфова. Фольклор көрүҥнэриттэн олоҥхону саламаны баайыы ырыата, хомус, оһуохай доҕуһуоллаатылар.
«Саха тылын төһө билэҕин» көрүҥҥэ «Дьулууртан» Светлана Ионовна Ефимова, Баахынайтан — Яна Яковлевна Корякина тэбис-тэҥҥэ тардыалаһан, сахалыы уруу-аймах, мээрэй, ас-үөл тылын-өһүн бэркэ билэллэрин көрдөрдүлэр. Бүтэһик түһүмэххэ кумааҕыттан кырыйан саха таҥаһын көрдөрүүгэ, «Дьулуурдар» Айталина Михайловна салайыытынан симэхтэри, дэйбиирдэри. халадаай киэргэллэрин, бухатыыр уол көстүүмүн,эр киһи сэлиэччигин,хаалтыһын, кыыс оһуордаах былааччыйатын, бастыцатын бэлэмнээбиттэрин көрдөрдүлэр. Оттон баахынайдар сценаҕа эр киһи ойуулаах-мандардаах хомуһуолун, дьахтар аныгылыы моһуоннаах оһуордардаах былааччыйатын, этэрбэһин, бастыцатын, кыыс мааны былааччыйатын,төбөтүн киэргэлин, уол оҕо ырбаахытын Марианна Ильинова маастардаан кырыйбыттарын таһаардылар.
Түмүгү таһаарыыга дьүүллүүр сүбэ бастакы, иккис миэстэ диэбэккэ, тэрийээччилэр туруорбут бириистэрин туттарда. Ол курдук, 10000 солк. бириис «Дьулуур» инбэлииттэр обществоларыгар, 15000 солк. Лииндэ нэһилиэгин дьаһалтатыгар тиксэрилиннэ.
