Алтынньы 14 күнүгэр, күнүс 16 чаастан «Дюмия» култуура киинин иннигэр, кыстыкка киирии сиэрэ-туома ситиһиилээхтик ыытылынна. Дьон-сэргэ кэлэн, күүс-уох ылан, уһун тымныы кыһыны көрсө бэлэмнэннилэр.
Бу кэрэ тэрээһиҥҥэ маннык эбэҥки норуотун сиэрдэрэ-туомнара ыытылыннылар: «Чичипкан» – ыраастаныы сиэрэ-туома; «Имты» – аал уокка сүгүрүйүү; «Сенкалавун» – бултуйуу сиэрэ-туома.
Аҕыйах ахсааннаах хотугу норуоттар Эдьигээннээҕи салаатын бэрэссэдээтэлэ Лидия Атласова, «Хотугу Хоһуун» киин салайааччыта Елена Храмова итии-истиҥ эҕэрдэлэрин тиэртилэр. Дария Алексеева уонна «Эдиген Һокто» фольклорнай ансаамбыл э5эрдэ ырыаларын бэлэх ууннулар.
Олохтоох алгысчыт Михаил Ефимов алгыс сиэрин-туомун ыытта, кыстыгы этэҥҥэ ааһыыны, Байанайтан көрдөстө. Алтынньы — эбэҥки норуотугар саамай суолталаах, түбүктээх уонна үүнүүлээх ый. Бу кэмҥэ кыстыкка бүтэһиктээх бэлэмнэнии уонна айылҕаттан байанай кутун тутуу (булт, балык) сүрүн миэстэни ылаллар.
Тэрээһин түмүгэр, кэлбит «Чычыпкаан» уонна «Имты» эбэҥки норуотун сиэрдэрэ-туомнара дьону-сэргэни ыраастаан, күүс-уох биэрэн, үөрүү-көтүү аргыстаах аастылар. Бары кыстыгы этэҥҥэ туоруурга күүс-көмө ыллылар. Тэрээһин эбэҥки норуотун күн эргиирин үҥкүүтүнэн түмүктэннэ.